Andoni Gutierrez zumarragarraren ofizioa eta afizioa arras ezberdinak dira: astelehenetik ostiralera abokatua da, eta asteburuetan Joseto ta Alayak elektrotxarangako abeslaria eta gitarra-jotzailea.
Andoni Gutierrez Mendizabalek oso argi zuen Zuzenbidea ikasi nahi zuela. «Nire ama ere abokatua da. Urretxun lan egiten du. Eta arrebak ere Zuzenbidea ikasi du. Gurasoek esan didatenez, txikia nintzenean arkitektoa izan nahi nuela esaten nuen. Baina DBHn argi nuen dagoeneko Zuzenbidea ikasi nahi nuela. Zuzenbidearekin lotura estua izan dut beti, amarengatik, eta gainera kontzientzia politiko garatua dut. Erabakitzeko unea heldu zenean, Zientzia Politikoen edo Zuzenbidearen artean erabaki beharra izan nuen eta Zuzenbidea praktikoagoa iruditu zitzaidan. Gradua egin ondoren, bi master egin nituen Madrilen eta Bartzelonan», azaldu du zumarragarrak.
Zuzenbideari enfoke praktikoa eman dio beti. «Karreran gehien gustatzen zitzaidana Zuzenbide Prozesala zen: jokoaren arauak ezagutu eta arazo bat dagoenean, ebatzi. Ikasten ari nintzenean, amarekin gauzatxoren bat egin nuen. Bartzelonako masterra amaitu ondoren, 2020an, Donostiako Quell Abogados bufetean hasi nintzen lanean. Ondoren, Urnietako egoitzan lan egin nuen. Zumarragan bulegoa ireki zutenean, bertako zuzendaria izan nintzen. Quellen bulegoa eramateaz gain, nire bezeroak nituen. Horien artean Gune higiezinen agentzia zegoen eta egun beraiekin lan egiten dut. Beraien lokalean bulego bat dut, beraientzat lan egitearen truke», aipatu du.
Herrietan lan egiten duten abokatuek denetik egiten dutela dio. «Zuzenbide Zibila egiten dut batik bat: kontratuak, familia, oinordetzak… Kontratuak gustatzen zaizkit batez ere. Pabiloi baten salerosketaren negoziazioa, adibidez. Egindako lanaren fruitua ikustea polita da. Lan Zuzenbidea ere egiten dut. Penala oso gutxi egiten dut: mehatxuren bat. Oso gustura nabil. Herrian lan egin nahi dut eta dagoeneko nire bulegoa dudanez, epe luzeko proiektua da. Erreferentea izan nahi dut».
Musika
Zuzenbidea bere ofizioa da eta musika bere afizioa. «Gure belaunaldiko gurasoek seme-alabak musika eskolara bidaltzeko ohitura zuten. 5 urterekin hasi nintzen solfeoan. Instrumentua aukeratzeko garaia heldu zenean, gitarra aukeratu nuen. Hainbat taldetan jo dut. Oso amateurrak guztiak. Baina ez dut musikarekin dudan harremana galdu nahi».
Egun, Joseto ta Alayak elektrotxarangan jotzen du. «Hobby bat da. Taldeko guztiok filosofia bera dugu: ondo pasatzea da gure helburua. Elektrotxarangek gorakada izan dute eta horri esker herri asko ezagutu ditugu». Uztailaren amaieran Lakuntzan jo zuten, Hatortxu Rocken azken edizioan. «Elektrotxaranga askok jo genuen eta sekulako giroa izan zen. Oso ondo pasa genuen».
Musikak laneko buruko minak ahazten laguntzen dio. «Elektrotxaranga izango ez banu, beste talderen batean joko nuke. Taldeari esker, etxean entseatzeko aitzakia dut eta asteburuetako kontzertuetan primeran pasatzen dut. Hobbya izaten jarraitzea nahi dut. Ez dut lana bihurtzea nahi. Lanerako bulegoa dut. Nire lana asko gustatzen zait, baina batzuetan gogorra da. Ezin dituzu bezeroak ahaztu. Gizakiok enpatikoak gara eta bezeroen arazoak etxera eramaten ditugu. Ez da txarra, bestela robotak izango baikinateke», amaitu du abokatu eta musikari zumarragarrak.
