Goierri Kirol Elkartearen areto futbol eta boleibol sailek Aldiri kiroldegiaren erabilera egutegiaren konfirmaziorik ez dutela salatu dute. Horra hor Otamotzera igorri duten gutuna.
Urretxuko alkateari,
aurtengo ekainaren 9an, Goierri Kirol Elkarteko boleibol eta areto futbol sekzioek Urretxuko kirol teknikariaren emaila jaso genuen bere lanpostua uzten zuela esanez. Bi sekzioek harridura handiz jaso genuen berri hori, berarekin lan egin ondoren ez baikenuen espero halakorik. Egindako lana eta gurekin izandako jarrerarengatik eskerrak eman genizkion, baita etorkizuneko lanean zortea opa ere. Hau horrela, eta denboraldi berriaren prestaketekin hasi behar ginela ikusita, udalaren informazio ofizialaren zain gelditu ginen. Baina, hau, ordea, ez zen iritsi.
Emaila jasotzen ez genuela ikusita, ekainaren 16an beste email bat idatzi genion Urretxuko Kultur sailari kirol teknikariaren lan uztearen albistea izan genuela esanez, baina udaletxetik ez genuela konfirmazio ofizialik. Ekainaren 23an eta uztailaren 1an beste bi email idatzi genituen erantzunaren zain jarraitzen genuela esanez. Erantzunik ez genuen jaso.
Emailak erantzuten ez zizkigutela ikusita, uztailaren 11n bi sekzioek idatzi formal bat aurkeztu genuen udaletxean gure kezka argitzeko asmoarekin. Idatzia sartu ondoren, uztailaren 17an deia jaso genuen uztailaren 22an bilera edukiko genuela esanez. Uztailaren 22ko arratsaldean bilera izan genuen eta, gure aldetik, gure kezkak zein ziren eta denboraldi berriaren antolaketa eta eskaerak aurkeztu genituen. Udalak entrenamenduekin hasi gintezkeela esan zigun, baina inongo konfirmaziorik gabe ordutegi aldetik. Hurrengo astean beste bilera bat izango genuela esan eta deia jasoko genuela esan ziguten. Oraindik dei horren esperoan gaude…
Iraila hasieran gaude eta berdin jarraitzen dugu, sekzio guztien artean oraindik egutegi formal bat finkatu gabe. Jada antolatutako gai asko konfirmatu gabe ditugu, horien artean adiskidetasun partidak eta baita ligako ordutegiak ere. Ezin dugu horrela jarraitu, ez baitakigu gure entrenamendu edo partida egunetan kiroldegia libre edukiko dugun edo ez. Aurreko urteetako koordinazioa nahiko eskasa izan bada, aurtengoa jada onartezina da. Sekzio guztien entrenamenduen eta partiden ordutegien koordinazioa gaur gaurkoz egina egon beharko luke. Ez dago koordinaziorik, ez dago fundamenturik.
Hau guztia gutxi izango ez balitz, udal gobernuko kirol zinegotziak ez duela jarraituko iritsi zaigu. Hau, aurrekoa bezala, kanpotik, udaletxetik ezer formala jaso gabe.
Hau guztia ikusita, zera eskatzen dugu: batetik, udaletxearekin hartu emana naturala izatea, bidaltzen diren emailak erantzutea, eta ematen diren aldaketen berri izatea. Bestetik, kirol instalazioak erabiltzen ditugun sekzio guztien artean bilera bat egitea, arduradun batekin, urteko egutegia finkatu eta koordinazioa sortzeko. Azkenik, urtean zehar bilera formalak antolatzea, sekzio guztien arteko balorazioak eta beharrak aintzat hartzeko.
Egoera hau konponduko delakoan,
agur bero bat.
