Uztailaren 29tik abuztuaren 3ra Boiseko Jaialdia egin zuten. Pandemiak 2020koa egitea eragotzi zuenez, berezia izan zen. Euskal Herritik ehunka lagun joan ziren. Tartean, urretxuar eta zumarragar asko.
Boise mundu osoko euskaldunen topagune izan da uda honetan eta Urretxuk eta Zumarragak hogei bat ordezkari izan dituzte. Batzuk lan kontuengatik joan dira, beste batzuk dantza egitera edo trikitixa jotzera, gehienak turista moduan… Batzuk kuadrillan, beste batzuk familiarekin…
Antton Fernandez Tio Teronen Semeak dantza taldearekin joan zen. «Deialdi ireki bat egon zen eta bost talde aukeratu zituzten: Neomak, Gatibu, Xabi Aburruzaga, Añorgako Arkaitz dantza taldea eta gu. Jaialdiko antolatzaileek aukeratu gintuzten. Herri kirolariak eta bertsolariak ere joan ziren. Hegaldia jaurlaritzak ordaindu zuen eta antolatzaileek Boiseko unibertsitatean eman ziguten ostatu».
Esperientzia «ederra» izan dela dio. Boiseko Oinkari dantza taldeko kideen lana azpimarratu du. «Igandero elkartzen dira. Batzuk oso urrutitik joaten dira Boisera. San Franciscoko dantzariak Zuberoako dantzak egiten ikustea oso hunkigarria izan da». Baita 4.000 lagunen aurrean dantza egitea ere. «Izotz hockey estadioan dantza egin genuen. Sekulako harrera egin ziguten. Oso hunkigarria izan zen».
Joxe Agustin Elortza, berriz, trikitixa jotzera joan zen. «Bederatzi lagun joan ginen: zazpi azkoitiar, azpeitiar bat eta ni. Lau soinujole eta bost panderojole. 20 urterekin Nevadan eta Californian izan nintzen, baina lehenengoz joan naiz Boisera. Oso gustura ibili gara. Soinua eta panderoa atera eta jendea gainera etortzen zen. Bata soinu handiarekin elkartu zitzaigun, bestea txistuarekin…».
Mikel Peñagarikano lanera joan zen, baina aisialdirako tartea ere izan zuen, noski. EHUko Zientzia eta Teknologia fakultateko irakaslea da. «Errektorea, errektoreordetza eta sei ikertzaile joan ginen, Boise State unibertsitatearekin sinatutako lankidetza hitzarmen baten baitan. Bilerak egin genituen hango irakasleekin. Ea ikasleen arteko hartu-emana eta ikerketa sustatzeko balio duen». Berak eta bere emazteak bidaia turismoa egiteko ere baliatu zuten. Yellowstone-n izan ziren, besteak beste.
Lagunak bisitatzera
Mikel Iturriotz eta Iker Azpeitia ez ziren lanera joan, baina lanean bukatu zuten… «Jon Ander Campos laguna San Franciscon bizi da eta bera bisitatzera joan ginen. Furgoneta bat alokatu genuen, bidaiatzeko asmoz. Jaialdia bidean zegoenez, bi egun gelditu ginen. Oso berezia izan zen eta oso ondo pasa genuen. Hango txosnan lan egin genuen, txorizoa eta kroketak prestatzen». Jaialdiaz gozatzeaz gain, Yosemite, Tahoe, Yellowstone, Grand Teton, Las Vegas eta sekuoien parkea bisitatu zituzten, besteak beste.
Sara Bidarte eta Josu Etxaniz ere lagunak bisitatzera joan ziren Amerikako Estatu Batuetara. Houston-en lan egiten ari den Irati Sanchez eta bere mutil-laguna bisitatzera, hain zuzen ere. Sanchez eta bere mutil-laguna (Endika Caño gasteiztarra) iazko uztailean joan ziren Amerikara eta datorren urteko ekainean itzuliko dira. Baliabide gutxi dituzten ikasleei eskolak ematen dizkiete. «Josuk Montanan ikasi zuen eta bertara itzultzeko asmoa zuen. Boisen elkartzea erabaki genuen», azaldu du Sanchezek.
Jaialdia asko gustatu zitzaien. «Amerikako Estatu Batuetara aspaldi joandako jendeak Euskal Herria, euskal kultura eta euskara nola maite dituzten ikustea txundigarria da. Bertso eskola online egiten dute, adibidez. Astero saio bat egiten dute, elkarrengandik oso urrun bizi diren zortzi lagunek. Oso deigarria iruditu zitzaidan».
Jasone Camara eta bere senarra Xiker eta Xanet semeekin joan ziren. Camara musikaria da eta duela 17 urte Juan Mari Beltranekin izan zen Amerikako Estatu Batuetan. «Boise ezagutzen nuen eta familiarekin itzultzeko asmoa nuen. 2020an joan behar ginen, baina ezin izan genuen, pandemia zela eta. Aurten lortu dugu. Seattle, Boise eta New York-en izan gara. Urtero bidaia handi bat egiten saiatzen gara», esan du.
Jaialdia asko gustatu zitzaion. «Horrenbeste euskaldun aurkitzeak harritu egin gintuen. Euskaraz hitz egiten entzun eta zuregana etortzen ziren. Lehen egunean Australiako euskaldun batekin hitz egin genuen. Herriko jendea ere ikusi genuen».
Horien artean, Aitziber Aierdi eta bere alabak: Uxue eta June. «Ateak Ireki programan parte hartu genuen. Maizpidera euskara ikastera etorri zen euskal jatorriko neska bat etxean hartu genuen, Isabel Kesling, eta aurten bere etxera gonbidatu gaitu. Bi aste eman ditugu Boisen, bertako bizimodua egiten». Jaialdikoa sekulako esperientzia izan dela dio. «Etxean geundela zirudien. Oso hunkigarria izan zen».
Rafa Zabalo, berriz, zegamarrez eta ondarrutarrez osatutako talde batekin joan zen. «Aspalditik nuen joateko gogoa. Lagun baten laguna joatekoa zela jakin nuen eta nik ere izena eman nuen. Taldeko bat, Scott, Oñatira etorri zen 1974an eta ondoren ondarrutar batekin ezkondu zen. Boisen, bere lehengusu baten etxean egon ginen. Jaialdia asko gustatu zitzaigun. Aktibitate asko zeuden eta Scott omendu zuten, gainera».
Jaialdian parte hartzeaz gain, hainbat toki bisitatu zituzten: New York, Yellowstone, San Francisco, Yosemite…
Aitziber Aierdi eta bere alabak, Isabel Kesling-ekin, Boiseko aireportuan.
Aitziber Aierdi eta bere alabak, Isabel Kesling-en familiarekin.
Aitziber Aierdi hainbat lagunekin. Ezkerrekoa Enetz Iturbe zegamarra da, Joseba Iturbe zumarragarraren semea.
Antton Fernandez, Tio Teronen Semeak taldeko lagunekin, Boiseko izotz hockey estadioan.
Antton Fernandez, ikuskizunean parte hartu zuten gainontzeko dantzariekin.
Antton Fernandez, Tio Teronen Semeak taldeko lagunekin.
Antton Fernandez, Tio Teronen Semeak taldeko lagunekin.
Antton Fernandez, Tio Teronen Semeak taldeko lagunekin, Boiseko izotz hockey estadioan.
Antton Fernandez, Iker Azpeitia, Jon Ander Campos eta Mikel Iturriotzekin.
Iker Azpeitia, Mikel Iturriotz eta Jon Ander Campos, txosnako lanetan laguntzen.
Joxe Agustin Elortza, Azkoitiko eta Azpeitiko trikitilariekin.
Joxe Agustin Elortza, jatetxe bateko sarreran.
Elortza eta gainontzeko trikitilariak, euskal artzainen karroen erakusketan.
Irati Sanchez, Endika Caño, Sara Bidarte eta Josu Etxaniz, euskal etxearen aurrean.
Jasone Camara, Asier Uriarte eta beraien semeak, Boiseko ikastolaren sarreran.
Jasone Camara, Asier Uriarte eta beraien semeak, Boiseko ikastolan.
Mikel Peñagarikano eta bere emaztea, Jaialdian.
Rafa Zabalo, zegamarrekin eta ondarrutarrekin, Boiseko aireportuan.
Zabaloren taldea, euskal etxean.
Zabalo eta Elortza.
Zabalo eta Iturbe.
Zabalo, Realaren lagun taldearen aurkezpenera joan zen Zuhaitz Gurrutxagarekin.
Zabalo, Imanol Pradales lehendakariarekin.
Amerikako Estatu Batuetara joandako euskaldun baten soinu txikia.
