Estatu espainiarreko toki ezberdinetatik etorritako 20 taldek kriket txapelketa jokatuko dute igandean Argixaon
Ekitaldia Zumarraga Sharks kriket taldeak antolatu du
Igandean Zumarragako Kriket Txapelketaren lehenengo edizioa jokatuko da Argixao estadioan. Estatu espainiarreko toki ezberdinetatik etorritako 20 talde bilduko ditu. 250 kirolari inguruk parte hartuko dute. Jardunaldia 07:00etatik 22:00etara izango da, etenik gabe.
Txapelketa Zumarraga Sharks Kirol Klubak antolatu du. Kirol elkarte hau kriketean jokatzen duten herritarrek sortu dute, herrian kriketa sustatzeko. Taldeko kideak pakistandarrak dira, baina taldeko ateak gainontzeko herritar guztiei zabalik daude.
Hala, igandeko ekitaldiaren helburuetako bat kriketa eta Zumarraga Sharks taldea herritarren artean ezagutzera ematea da. Antolatzaileek jana eta edana eskainiko diete gerturatzen diren guztiei Izazpiko kantxa estalian, hitzorduaren izaera soziala eta jai giroa indartzeko.
Udalak herritar guztiak animatu ditu kirol ekitaldira gerturatzera eta aniztasun eta topaketa egun batez gozatzera. «Aukera paregabea da Zumarragako eta inguruko herrietako herritarrentzat, gure inguruan oraindik ezezaguna den baina geroz eta presentzia eta interes handiagoa duen kirola ezagutzeko. Baita integrazioa, elkarbizitza eta herritartasun baloreak sustatzeko ere», adierazi du udalak.
