Zintzo Mintzok 'Gu euskaraz gara' ekimena antolatu du, herriko euskaltzaleen ikusgarritasuna lortzeko
'Gu euskaraz gara' zapiarekin ateratako argazki bat eta hitz bat bidaltzeko eskatu diete herriko euskaltzaleei eta hitz guztiekin kate bat osatuko dute
Auzia ez baita izan ala ez izan, nola izan baizik. Izatea egitea da eta egiteko aukeratu egin behar da. Egiten duguna gara eta Gu euskaraz gara.
Gutariko bakoitzak hizkuntza ugari izan ditzake, baina euskarak gu baizik ez gaitu. Beraz, nola izango garen erabaki beharra dago. Euskara ez dadin izan ez toponimia, ez gastronomia huts, ez buenos días baten ostean datorren kortesiazko egun on bat eta, batez ere, euskara ez dadin izan altxor bat. Altxorrak kutxan sartu eta lurperatu egiten dira, gero museoetan ikusgai jartzeko. Ez fidatu sekula euskara altxor bat dela dioenaz.
Duela 50 urte joan zitzaigun Arestik argi esan zuen:
Gure bihotzetan ez da euskararentzako kupidazko sentimendurik kabitzen, guretzat euskara premia bat da. Nork esaten du ogia maitatzen duela? Ogia ez da maitatzen, behar izaten da.
Poesia mailu bat dela ere esan zuen, baina tamalez ez gabiltza poesietarako. Gure kultura aberatsa baita, baina kulturgileak pobreak. Eta azkenaldian euskararen bueltan entzuten diren mailukadak ez datoz poesia liburuetatik, epaitegietatik baizik. Kolpez kolpe azken 40 urteetan eraikitakoa desegiten dabiltza. Milioi bat gara, baina ez digute euskaraz bizitzen uzten. Ez gara hizkuntza gutxitu bat, herri isildu bat gara.
Jada, euskaldun izatearekin ez da aski, euskaltzale aktiboak behar ditugu. Beraz, gorde agendan aurtengo abenduaren 27a, Bilboko Miribilla euskaltzalez beteko dugu Pizkunde berri bati hasiera emateko.
Hizkuntzarena ez baita fenomeno meteorologiko bat, auzi politikoa da, bizitzako eremu guztiak bustitzen dituena. Pasa den Korrikako amaiera ekitaldian Garazi Arrulak esan bezala: arrainak ura, eta euskarak ekosistema osoa. Basoak, soroak, plazak, lantegiak, pantailak… guztia behar dugu, eta ematen ez digutena guk hartu beharko dugu.
Ez gatoz euskara salbatzera. Izatekotan, kontrara. Herri bezala salbatuko bagara, garen hori izango bada, euskaraz izango baita. Salbatzekotan, euskarak salbatuko gaitu. Salbatzekotan, euskaraz salbatuko gara.
Horregatik, irten plazara, jantzi zapia eta partekatu Gu euskaraz gara mezuarekin bat egiten duen beste norbaitekin. Euskaldun izatearekin ez da aski, euskaltzale izan gaitezen.
Auzia ez baita euskaldun izan ala ez izan, nola izan baizik. Izatea egitea da eta egiteko aukeratu egin behar da. Egiten duguna gara eta Gu euskaraz gara”.
