Edateko uraren hornidura eta estolderia zerbitzua Aquarberi esleitzea onartu dute Zumarragako osoko bilkuran
Ur zerbitzuaren esleipenaren inguruko eztabaida. Zumarragako astearteko osoko bilkuran edateko uraren hornidura eta estolderia zerbitzua Aquarberi esleitzea onartu zen, PSE-EE eta EAJren botoekin. EH Bilduk aurka bozkatu zuen.
Urarena azken bi legealdietako gai nagusia izaten ari da. EH Bilduk zerbitzua «publifikatzea» nahi du eta PSE-EEk zerbitzua publikoa dela, baina zeharka ematen dela dio. Hori gutxi balitz, esleipen prozesua asko korapilatu da. Jaurlaritzak pleguak atzera bota zituen, diru eskaintzari garrantzi gutxiegi ematen zitzaiolako. Plegu berriak egin ziren eta lehiaketa Global-Omnium enpresak irabazi zuen, baina bigarren gelditu zen enpresak (Gestagua) errekurtsoa jarri zuen irabazleak ez zuelako pleguetan jasotako guztia betetzen. Kontratu Errekurtsoen Administrazio Organoak arrazoia eman zion. Baina Gestaguak ere ez ditu baldintza guztiak betetzen eta, hala, hirugarren sailkatuak kudeatuko du zerbitzua. Azken hamarkadetan zerbitzua kudeatu duen Aquarbek, hain zuzen ere. 400.000 euro pasatxo ordainduko ditu urtero.
Elgarresta kritiko azaldu zen. «Oinarrizko zerbitzuak merkantilizatzen direnean, gure herria multinazionalen guda zelai bihurtzeko arriskua dugu. Azkenean, udalari 140.000 euro gutxiago emango dion enpresak emango du zerbitzua. Bi udalak pribatizazioaren alde egonda, zergatik ez dituzue pleguak elkarrekin prestatzen? Urretxu eta Zumarraga kudeaketa pribatua duten udal bakarrak dira».
Serranok zerbitzua publikoa dela baina zeharka eskaintzen dela erantzun zion. «Txostenek zerbitzua eskaintzeko modu onena dela diote».
