Urolako trenaren Zumarragako geltokia datorren urte amaierarako zaharberrituko dute eta gizarte arloko gaietarako erabiliko da
Eraikinaren eta inguruaren zaharberritzearen aurrekontua 1.760.000 eurokoa da eta Eusko Jaurlaritzak 1.400.000 euro jarriko ditu
Zumarragako astearteko osoko bilkuran Urolako trenaren geltokia zaharberritzeko proiektua onartu zuten. Eraikinak 100 urte ditu eta trenak ibiltzeari utzi zionetik itxita dago. 2005ean udalak erosi zuen eta ordutik zaharberritzeko eta erabilpena emateko ahaleginak egin ditu, baina ez du lortu. Azkenean, ekipamendu sozial bezala erabiliko da, Jaurlaritzaren laguntzari esker. Obraren aurrekontua 1.760.000 eurokoa da eta Jaurlaritzak 1,4 milioiko dirulaguntza emango du. Obra aurki esleituko da. Asteartean proiektua onartu zen, PSE-EE eta EAJren aldeko botoekin. EH Bilduk abstentzioa eman zuen.
Eraikina 2026 amaierarako prest egongo da. Epaileak bideratutako Familia Elkargunea izango da eta Gizarte Zerbitzuek, auzoetako elkarteek eta ZU Mugituz kirol zerbitzuak ere eraikina erabiliko dute. Alkateak Emakumeen Etxeko ekitaldietarako ere erabili daitekeela esan zuen.
EH Bilduko Aritz Elgarresta eraikina berreskuratzearen alde azaldu zen eta potentzialtasun handia duela esan zuen, baina asteartean onartu zen proiektuaren inguruko zalantzak azaldu zituen. Parte hartze prozesua ere ezbaian jarri zuen, azkarregi egin delako. «Parte hartze prozesu batek eboluzio bat izan behar du. Galdetegi bat pasatzea ez da parte hartze prozesu bat egitea».
Erabilpenei dagokionez, Emakumeen Etxeko ekintzak eta Familia Elkargunea bateraezinak izan daitezkeela aipatu zuen. «Bateragarritasuna aztertzeko txosten bat egingo zela esan zen. Egin al da?». Serranok Emakumeen Etxeko ekintzak hor egitea onuragarria izan daitekeela ere esan zela gogoratu zuen. Parte hartze prozesuari buruz ere hitz egin zuen. «Zuek nahi bezalakoak ez badira, ez dute balio. Herri guztiak parte hartzeko aukera izan du, webgunearen bidez», esan zion Elgarrestari.
