Javi Alonso zumarragarrak Beloki ilunabarrak erakusketa irekiko du gaur (asteazkena), 18:30ean, Zumarragako Zelai Arizti kultur etxean. Erakusketan Zumarragako Beloki mendian ilunabarrean ateratako argazkiak ikus daitezke. Kolore guztiak mendi bakarrean.
Alonsok urtebete eman zuen argazkiak ateratzen: 2023ko abendutik 2024ko abendura. «Denbora asko neraman Belokira igo gabe eta pinu guztiak moztu zituztela ikusi nuen. Inoiz bista hori ikusi gabea nintzen eta deigarria egin zitzaidan. Eguzkia handik sartzen denez, ilunabarra polita izan behar zela pentsatu nuen. Hala, egun berean ilunabarra ikustera igo nintzen. Lehen argazki hori ere erakusketan jarri dut: zeruak urdin ilun kolorea du eta gurutzearen ondoan bi neska daude. Eguzkia nola sartzen den ikustea polita izan behar zela pentsatu nuen eta itzuli egin nintzen. Argazki hori ere polita zenez, urte horretan Belokiko ilunabarren argazkiak ateratzea erabaki nuen. Egun batzuetan argazki politak lortzen nituen eta beste batzuetan ez. Batzuetan argazkirik gabe itzultzen nintzen etxera», azaldu du zumarragarrak.
Alonsok ez zuen erakusketa egiteko asmorik. «Argazkiak lankide bati erakusten nizkion eta erakusketa egitea proposatu zidan. Hala, urtearen erdialdean-edo erakusketa egitea erabaki nuen. Izan ere, argazki bereziak dira. Guztiak toki beretik daude aterata». Zeruaren kolorea, zuhaitzen hostaila eta jendea bakarrik aldatzen da.
Ez daki zenbat aldiz igo zen Belokira. «Urtarriletik apirilera askotan igo nintzen. Udan, ez horrenbeste. Irailean, urrian eta azaroan ere askotan igo nintzen. Joatearen poderioz, argazki onak noiz lor nitzakeen ikasi nuen: hezetasunaren arabera, lainoen arabera… Hurrengo egunerako euria iragartzen bazuten, ilunabarra polita izaten zen. Bestalde, argazkiak atera heinean, argazki berriak bururatzen zitzaizkidan».
Nahi zituen argazki ia guztiak lortu zituen. Ekaitz baten argazkia nahi zuen eta hori aurten lortu du. «Ekaitza itsaso aldean zegoela uste nuen, baina Belokira heldu nintzenerako gainean nuen. Argazkia atera, kamera gorde eta tximistengandik ihesi jaitsi nintzen. Etxera blai eginda iritsi nintzen. Egun horretan argazki bertikala atera nuen, zeruaren iluntasuna jasotzeko. Bestalde, ortzadarraren argazkirik ez dut lortu».
Aurora borealaren itxura
Argazki askotan jendea ageri da. «Hasieran argazki guztietan jendea atera nahi nuen, baina ordu horretan ez da jende asko igotzen mendira. Argazki batean nire alaba ageri da, saltoka. Beste argazki batean txakur batekin igotzen zen gizonezko bat ageri da. Gizon hori behin baino gehiagotan ikusi nuen».
Erakusketan 27 argazki jarri ditu. Guztien azpian erakusketaren izenburua eta logoa ageri dira. Logoa Josu Marotok egin du. Bi argazki ditu bereziki gustuko: lehenengoa (2023ko abenduaren 28an atera zuen) eta aurora boreal bat dirudiena.
Aurten ez da horrenbestetan joan Beloki mendira, noski. «Belokira horrenbeste aldiz igo ondoren, sasoian jarri nintzen. Baina ez nuen Belokitaz nazkatuta bukatu. Asko gustatzen zaidan mendia da. Hori bai, aurten gutxiagotan joan naiz eta beste ordu batean. Lasaiago».
Izan ere, iaz gauez jaisten zen ia beti. «Eguzkia sartu arte itxaroten nuen, badaezpada ere. Askotan bost minututan dena aldatzen zen: ezer berezia ez ikustetik, zeru zoragarria ikustera. 20 segundo irauten zuen, baina merezi zuen. Urrutiko ilunabarrez hitz egiten dugu, baina ez dago herritik atera beharrik ilunabar ederrak ikusteko», aipatu du.
Urriaren 31ra arte
Belokiko ilunabarren erakusketa hilaren 31ra arte egongo da zabalik: astelehenetik ostiralera 09:30etik 13:30era eta 15:00etatik 21:00etara, eta larunbatetan 10:00etatik 13:30era.
Datorren urtean beste erakusketa bat egiteko asmoa du, Zarraparra kolektiboko lagunekin batera: Belokiko lasaitasunetik musika jaialdietako iskanbilara. «Jaialdiak antolatzeari utzi diogunez, urte hauetan guztietan ateratako argazkiekin erakusketa egin nahi dugu».
