Esketx batzuk egin eta sare sozialetan ikusgai jarri dituzte
Urretxu eta Zumarragako Bi-Tartean merkatari elkarteak Irrian askoz hobe kanpaina jarri du abian, herriko merkatarien gertutasuna eta adeitasuna aldarrikatzeko. Merkatariek umorezko esketxak egin dituzte, adimen artifizialaren laguntzarekin, eta sare sozialetan ikusgai jarri dituzte. Esketxak Gattiken enpresak egin ditu.
Merkatari elkarteak atzo aurkeztu zuen kanpaina, Jon Luqui Urretxuko alkatearekin eta Arantxa Gonzalez Urretxuko zinegotziarekin.
Egiteko modua argi dutela azaldu zuten. «Etengabeko hobekuntza, eguneraketa eta berrikuntza bilatzen ditugu. Horretarako, eskura ditugun baliabideak aztertzen, probatzen eta praktikan jartzen saiatzen gara, Urretxuko eta Zumarragako herritarrei beti proposamen onenak eskaini ahal izateko».
Kanpainak egiteko orduan ere baliabide berriak aztertzen dituzte. «Oraingoan, adimen artifiziala erabiliz, irria helburu, kanpaina berri bat jarri dugu abian Urretxuko Udalaren, Zumarragako Udalaren eta Eusko Jaurlaritzaren laguntzarekin. Adimen artifizialak dituen aukerak esploratu eta irudimenari bidea egin diogu», aipatu zuten merkatariek.
Irrian askoz hobe kanpainak herritarrak eta merkatariak lotu nahi ditu, umorea zubi bihurtuz. «Asko dira tokiko merkataritzaren ezaugarriak. Oraingoan, hurbileko merkataritza irri egiteko aitzakia ere bihurtu dugu: gure ateak ireki eta irribarre egiteko, gure ateak ireki eta une bereziak sortzeko, gure ateak ireki eta elkarlanean aritzeko. Bakoitza bere arloan adituak eta arituak gara, eta irribarre batekin gure produktuak eta zerbitzuak eskaintzeaz gain, gure ezagutza ere zuekin partekatu nahi dugu».
Eskaintza zabala
Elkarrekin, Urretxun eta Zumarragan, kalitatezko eskaintza sendoa osatzen dutela gehitu zuten. «Erostea erraza eta erosoa da, beti gertu eta prest gauzkazuelako. Jasangarria ere bada, garraio beharra murriztuz, ingurumen inpaktua txikiagoa delako. Gainera, kontsumo arduratsua bultzatu nahi dugu: ez dugu gehiago eros dezazun nahi, hobeto eros dezazun baizik. Eta batez ere, aukeratzeko askatasuna bultzatu nahi dugu: gure proposamenak ezagutzea, baloratzea, konparatzea eta erabaki egokiena zuk hartzea nahi dugulako», amaitu zuten Bi-Tarteaneko kideek.
Horra hor Gattikenek Bi-Tarteanentzat egindako esketxetako batzuk. Hurrengo egunetan gehiago igoko dituzte sare sozialetara.
