Zumarragan bertako produktuak eta azoka aldarrikatzeko bi ekitaldi antolatu dituzte aste honetarako. Ostiralean bertako produktuen dastaketa egingo dute eta larunbatean sukaldaritza ikastaroa.
Ostiralean, 19:00etan, Show Cooking saioa egingo dute Leturiatarren plazan. ATA harategiko Juanjo Aranburuk eta Amaia Aierbe nutrizionistak gidatuko dute saioa. Bertaratzen direnek bertako produktuak dastatzeko aukera izango dute. Ekitaldia Bertatik Bertara egitasmoaren barruan antolatu dute.
Larunbatean, berriz, sukaldaritza ikastaroa egingo dute azokara kontsumitzaile berriak erakartzeko. Hala, ikastaroa azokan bertan izango da, 11:00etatik 12:30era.
Ekitaldia Gipuzkoako Azoken Sarea lantaldeak antolatu du, Zumarragako Udalarekin elkarlanean, Azokatik Mahaira egitasmoaren barruan. «Azken urteetan aldatzen ari da kontsumitzaileek azokekiko duten harremana eta honek aukera bikainak irekitzen ditu kontsumitzaile berri eta gazteagoak erakartzeko espazio hauetara», azaldu dute antolatzaileek.
Hala, bertako eta garaiko produktuak ezagutzera eman eta balioan jartzeko, sukaldaritza ikastaroak egingo dira Gipuzkoako hamaika azokatan. Anne Otegi sukaldariak eta Aitziber Aizpuru nutrizionistak gidatutako saioak izango dira. Otegi Bergarako Oxirondo azoka gaurkotzeko sortutako Elikaenea proiektuko kidea da eta Aizpuru, berriz, Azpeitiko Eliku zentroko arduraduna.
Osasuna
Zumarragako ikastaroa herritar guztiei irekia izango da eta parte hartzeko nahikoa izango da azokara gerturatu eta bertan jarriko diren aulkietan esertzea. Parte hartzaileek garaian garaiko produktuak kontuan hartuta etxean modu azkarrean eta erosoan kozinatzen ikasiko dute. Osasuntsu jateak duen garrantzia ere azpimarratuko da. Hala, elikagai bakoitzak nutrizionalki dituen abantailak jakiteaz harago, osasuntsu nola elikatu ikasteko aukera egongo da.
Saioan zehar kozinatutako platera dastatzeko aukera egongo da ikastaroaren amaieran. Azokatik Mahaira egitasmoaren barruan antolatu diren sukaldaritza saioetan egingo diren errezetak eta nutrizio aholkuak ere banatuko dira.
