Atapuercako aztarnategiko zuzendarietako batek Urretxu bisitatuko du
Larunbat honetan Urretxuko Mineralogia eta Paleontologia Astearen 37. edizioa hasiko da, Karrantzara (Bizkaia) egingo duten txangoarekin. Gainontzeko ekitaldiak astelehenetik aurrera izango dira. Eduald Carbonell adituaren bisita eta dinosauroen erakusketa dira deigarrienak.
Aurkezpen ekitaldia gaur goizean izan da, Urretxuko mineralen eta fosilen Urrelur museoan. Ekitaldian Jon Luqui alkateak, Javier Aguado Mineralogia eta Paleontologia Asteko sustatzaileak, Argazkia elkarteko Jokin Antoñanak eta ButaK 21 zineklubeko Javier Martinek parte hartu dute. Luquik Mineralogia eta Paleontologia Astearen garrantzia azpimarratu du. «Horrelako egitasmoek komunitatea egiten dute».
Lehen ekitaldia larunbat honetan izango da. Karrantzako Pozalagua kobazulora eta El Karpin parke ekologikora joango dira. Pozalaguan estalaktita eszentrikoen pilaketarik handiena dago. Eszentrikoak, grabitate legeei aurre eginez, edozein norabidetan hazten diren estalaktitak dira. El Karpin, berriz, basoko animaliak hartzeko zentroa da.
Parte hartzaileak 08:20ean elkartuko dira Urretxuko Iparragirre plazan. 10 minutu iraungo duten azalpenen ondoren, autobusa Bizkaira abiatuko dira. 11:00etan Pozalagua parketxera iritsiko dira eta 12:00etan kobazuloa bisitatuko dute. 13:15ean Pozalaguako Aizko jatetxean bazkalduko dute. 16:00etan El Karpin parkea bisitatuko dute eta 18:00etan Urretxura abiatuko dira. 20:00ak aldera iritsiko dira herrira.
Helduek 46,40 euro ordaindu behar dute (autobusa, gida, sarrerak eta bazkaria barne) eta gazteek 33 euro (7-16 urtekoak, heldu arduradun batekin joan beharra dute).
Parte hartu nahi dutenek urrelur@urretxu.eus helbide elektronikora mezua bidali behar dute, izen-emate orria beteta. Izen-emate orria urretxu.eus webgunean aurkituko dute.
Erakusketak
Astelehenetik aurrera doako bisita gidatuak izango dira mineralen eta fosilen museoan. Baita dinosauroei buruzko erakusketa monografikoa ere. Erakusketa Urretxuko udaletxeko portaloian izango da. Museoko ateak egunero irekiko dira: astelehenetik ostegunera 17:00etatik 20:00etara eta ostiralean, larunbatean eta igandean 10:00etatik 14:00etara eta 16:00etatik 20:00etara. Bisitaldi gidatuei dagokienez, doanekoak izango dira: datorren asteko ostiralean, larunbatean eta igandean, 11:30ean, 17:00etan eta 18:00etan.
Udaletxeko portaloiko erakusketa ordutegi berean irekiko da. Bertan, Alberto Fernandez zumarragarrak egindako dinosauroak, Molina de Aragon (Guadalajara, Espainia) herriko zientzia museoak utzitako monosauroen fosilak eta Javier Aguadoren bildumako aleak ikusi ahal izango dira. Gainera, bisitariek museoko maskotarekin (dinosauro bat) argazkia ateratzeko aukera izango dute.
Asteazkenean Alfonso Par zuzendariaren Des-extincion dokumentala emango dute Urretxuko Labeaga aretoan. Emanaldia 20:00etan hasiko da. Dokumental horretan desagertutako espezieak berpizteari buruzko aukerez hitz egiten da. Emanaldiaren ondoren solasaldia egingo dute. Ekitaldian Eudald Carbonell-ek parte hartuko du. Carbonell Atapuercako (Burgos, Espainia) aztarnategiko zuzendarietako bat izan da. «Carbonell apartekoa da. Dagoeneko hiru txango egin ditugu Atapuercara eta, beraz, aspalditik ezagutzen gaitu. Bartzelonan sari bat jasoko du eta ondoren Urretxura etorriko da autoan. Bera bezalakoak Urretxura etortzeak lanean jarraitzeko indarra ematen digu. Labeaga betetzea espero dut. Bera ekartzeak merezi izan duela esan ahal izatea espero dut», azaldu du Aguadok.
Asteburuko ekitaldiak
Azaroaren 1ean, larunbata, Pablo Marcos adituak mososauroei buruzko hitzaldia egingo du. 12:30ean izango da, kultur etxean. Ondoren, udaletxeko erakusketa bisitatuko dute. Marcosek mososauroei buruzko liburua idatzi du. Itsasoan bizi ziren narrastiak ziren.
Bukatzeko, azaroko lehen asteburuan mineral, fosil eta harribitxien azoka, mineralogia eta paleontologia parkea eta argazki lehiaketa izango dira. Azoka Ederrena pilotalekuan izango da. Ostiralean, larunbatean eta igandean irekiko dute, 10:00etatik 14:00etara eta 16:00etatik 20:00etara. Haurrentzako mineralogia eta paleontologia parkeari dagokionez, Iparragirre plazan izango da. Ordutegi berean irekiko dute. Bertan, haurrek aurrehistoriako gizakiek bezala margotzeko, urrea bilatzeko eta fosilak bilatzeko, meategi batean minerala bilatzeko eta dinosauro bihurtzeko aukera izango dute.
Asteburuko ekitaldiez gozatzera gerturatzen direnek argazki lehiaketa batean parte hartu ahal izango dute. Mineral eta fosilen argazkiak argazkielkartea@gmail.com helbidera bidali behar dira, azaroaren 5eko 14:00ak baino lehen. Parte hartzaile bakoitzak hiru argazki aurkez ditzake, gehienez. Sariak azaroaren 21ean banatuko dira, 19:00etan, udaletxeko portaloian. Antoñanak mineralak eta fosilak ukitu aurretik, azokako saltzaileei baimena eskatu behar zaiela gogoratu die parte hartzaileei. «Javierrek lehiaketa hau antolatzea proposatu zigun eta, egia esan, interesgarria eta deigarria da. Argiarekin jolastu beharra dago».
