Euskaltel-Euskadi taldeak Nicolas Alustiza, Xabier Isasa eta Jokin Murgialdai txirrindularien berritzeak berretsi ditu. Hiru euskal gazteek maillot laranjarekin jarraituko dute 2026an.
Alustizak (Zumarraga, 2003) aurreneko bi urteak bete ditu Euskaltel-Euskadirekin, 2024an harrobiko taldetik igo ondoren. “Txirrindulari gipuzkoarrak bere mailaren distirak utzi ditu, Figueira, Katalunia edo Dunkerque bezalako mailako lasterketetan ihes eginda, edo sailkapen onak lortuz Asiako egutegian, 12. Trans-Himalaya Cycling Racen eta 21. Hainango Tourrean”, diote Euskaltel-Euskadi taldeak hedabideetara igorritako prentsa oharrean.
Isasarentzat (Urretxu, 2001) bosgarren denboraldia izango da. Berak ere harrobiko taldetik salto egin zuen profesional mailako taldera. “Indar handiko txirrindularia, aurten bi ihesaldi bete zituen etxean, Indurain Sari Nagusian, 149 kilometro, eta Itzulian, Lodosatik bi kilometrora harrapatuta, ihesean 170 kilometro baino gehiago egin ondoren. Beste alde batetik, bederatzigarren sailkatu zen Taiwango Tourrean. Iaz, Espainiako Vueltan protagonista izan zen lau ihesalditan”.
Jorge Azanza, Euskaltel-Euskadi taldeko kirol arduraduna, gustura ageri da. “Hiru txirrindulari hauek zertzelada onak eskaini dituzte, aurten eta orain arteko ibilbidean, eta hazkude horrekin jarraitzeko aukera izango dute. Ziur gaude orain arte ikusi duguna baino gehiago dutela. Gure helburu nagusia taldeari sendotasuna emateko duten onena ateratzea izango da, hau da, Isasa sasoirik onenean izatea, Nicok aurrerapausoa ematea eta Murgik mendiko etapetan sendotasuna erakustea. Batzuetan, kanpoan bilatu nahi ditugun gaitasun horiek, etxean ditugu”.
Aipatzekoa da datorren urtean Goierri kirol elkartearen txirrindulari eskolan aritutako lau gazte profesional mailan arituko direla: Isasa, Alustiza, Alex Diaz urretxuarra (Caja Rural) eta Gari Ugarte legazpiarra (Euskaltel-Euskadi).
