Atzo, Bizkaiko Turtzioz herriko Pandos meategitik ekarritako kaltzita erraldoi bat jarri zuten Urretxuko kultur etxeko lorategian. Meategia ustiatu duen Micronatur enpresak dohaintzan eman dio Urretxuko Udalari, Mineralogia eta Paleontologia Astea dela eta. Euskal Energiaren Erakundeak %50eko partaidetza du enpresa horretan.
Meategia Armañongo parke naturalean dago, Jorrios mendiaren azpian. Pandoseko kaltzita meategia anomalia bat da, kaltziten tamainagatik, homogeneotasun fisiko-kimikoagatik eta purutasunagatik. Behe Kretazeoko kareharri masiboetan du jatorria.
Pandos meategia 2024an itxi zen, erreserbak agortu ondoren. Bertan ez zegoen zabortegirik eta ezta garbitzeko edo dekantzatzeko putzurik. Izan ere, lortzen zen minerala erabat homogeneoa zen eta zuzenean birrindu zitekeen. Urtero 25.000 tona kaltzita lortzen ziren. Meategiko ganbera nagusiak 100 metroko luzera, 40 metroko zabalera eta 50 metroko altuera du.
Kaltzitak erabilera asko ditu. Papergintzan, pintura egiteko, plastikoak eta gomak egiteko, elikadurarako eta industria farmazeutikoan erabiltzen da. Pandos meategiko kaltzita papergintzan erabili da batez ere. Kaltzita hautsa, urarekin nahastuta, zelulosa oreari gehitzen zaio. Idazteko, fotokopiak egiteko eta inprimatzeko erabiltzen den paperaren %20 kaltzita da. Kaltzita pinturari gorputza eta zuritasuna emateko, elikagaiei testurak eta koloreak emateko eta sendagaiei gorputza emateko eta kaltzioa gehitzeko ere erabiltzen da.
