Laia Araiztegi, Nahia Jiao Lizarralde eta Elene Igartzak irabazi dute Boluntariotzaren Eguneko pankarta lehiaketa
Abenduaren 5ean Boluntariotzaren Nazioarteko Eguna da. Zumarragako Udalak pankarta lehiaketa antolatu du egun hori iragartzeko. 120 ikaslek parte hartu dute eta lehen saria Laia Araiztegi De la Serna, Nahia Jiao Lizarralde Fernandez eta Elene Igartza Mendezek irabazi dute. Horretaz gain, epaimahaiak aipamen berezia eman die Izeia Gomez Gantxegi, Maddi Izagirre Salaberria eta Intza Oiartzabal Amenabarri.
Parte hartzaile guztiek boluntariotzaren balioari buruzko lan sortzailea eta gogoetatsua egin dute. Eskolen elkarlana funtsezkoa izan da adierazpen artistikoa, gizarte sentsibilizazioa eta talde lana uztartzen dituen proposamena bultzatzeko. Aurkeztutako ideia bakoitzak komunitate solidarioago bat eraikitzearen garrantzia ulertzen duen gazteriaren ahalegina, dedikazioa eta begirada konprometitua islatzen ditu.
Epaimahaia Arte Ederretako bi irakaslek eta Sare Solidarioa mahaiko kideek osatu dute eta epaimahaiko kideek lanen kalitate artistikoa eta boluntariotzaren benetako zentzua transmititzeko gaitasuna nabarmendu dituzte: laguntzea, elkarlana eta gure ingurunea aldatzea, inplikazio kolektiboaren bidez.
Arantxa Gonzalez Zumarragako zinegotziak eta Mari Carmen Viedmak, Sare Solidarioa osatzen duten elkarteen ordezkari gisa, parte hartu dute sari banaketa ekitaldian. Biek, belaunaldi berriak gizarte kohesioan eta boluntarioen balioen sustatzean inplikatzearen garrantzia azpimarratu dute.
Aurkeztutako marrazkiak kultur etxeko sarreran ikusgai egongo dira, azaroaren 28ra arte.
Azkenik, Boluntariotzaren Eguna dela eta, herritar guztiei dei egiten zaie parte har dezaten herriak elkartasunarekin duen konpromisoa sinbolizatuko duen irudi kolektiboa sortzen. Ekitaldia abenduaren 4an izango da, 13:15ean, Euskadi plazan.
