50 urte pasa dira ia Margarita Bueno zumarragarra ingeles eskolak ematen hasi zenetik. 1986an You eskola ireki zuen Zumarragan. Bere ahizpek berekin lan egin dute eta bere iloba Irene Perez de Arenazak lekukoa hartu dio.
Margarita Buenok 14 urte bakarrik zituen bere aitak Ingalaterrara bidali zuenean. «Aita erreminta makina ekoizlea zen eta ekoizten zuen guztia esportatu egiten zuen. Beste herrialdetakoekin konpontzeko, batzuei eta besteei laguntza eskatzen zien. Ingelesa jakitea oso garrantzitsua zela konturatu zen eta Ingalaterrara bidali ninduen. Urtebete eman nuen han. Ez dut inoiz berak esandakoa ahaztuko: ikasten duzunean itzuliko zara».
14 urte bakarrik zituen eta ez zitzaion erraza izan moldatzea, baina lortu zuen. «Hasieran oso bakarrik sentitzen nintzen. Garai hartan, egoera egungoaren oso ezberdina zen. Ez zegoen egungo teknologiarik eta ez zen egun bezainbeste jende joaten. Londresko hego-ekialdean izan nintzen, Essex konterrian, eta han ez zegoen hemen inguruko inor. Esperientzia gogorra izan zen, baina asko ikasi nuen, munduko ateak ireki zizkidan».
Zorionez, Ingalaterrara joan aurretik ingelesa ikasten aritu zen. «Anaiak eta biok ingelesa ikasi genuen bi ikasturtetan zehar, ezagun batekin. Garai hartan inork ez zuen ingelesa ikasten, denek frantsesa ikasten zuten». Bere ahizpa Beatrizek beraien aita «aitzindaria» izan zela gehitu du.
Ingeles apur bat zekien arren, ez zitzaion erraza izan egokitzea. «Nik idatzizko ingelesa ikasi nuen eta hasieran asko kosta zitzaidan jendeari ulertzea. Bi haur zaintzen nituen eta ingeles eskoletara joaten nintzen. Asko ikasi nuen. Azkar ikasi nahi nuen, gainera, lehenbailehen etxera itzultzeko», oroitu du.
Eta azkar ikasi zuen. «Oso ondo ikasi zuen eta ingeles irakasle bezala lan egiteko aukera suertatu zitzaion», azaldu du bere ahizpak. «Medikuntza gustatzen zitzaidan, baina Ingalaterrara joateak eta ingelesa ikasteak beste bide bat hartzeko aukera eman zidan. Hizkuntzan murgildu nintzen eta asko gustatu zitzaidan. Gainera, garai hartan Londres puri-purian zegoen, dena berria zen niretzat…», gogoratu du.
Etxera itzuli zenean, aitari lagundu zion eta idazkaritza ikasten eta ingeles eskolak ematen hasi zen. «Nire lehen ikasleak nire anai-arrebak eta lau bizilagun izan ziren. Horien artean, urte askotan gurekin lan egin duen Elsa Retes», azaldu du.
Geroz eta ikasle gehiago zituzten eta bere ahizpa Beatriz laguntzen hasi zitzaion. «Institututik jaisten nintzenean, nire ahizpari laguntzen nion», gogoratzen du. Lehen pausoak gurasoen etxean eman zituzten: Zumarragako Hiri Lorategia auzoan. Hasieran etxeko sukaldean lan egiten zuten eta ondoren etxe ondoan zuten bodegan.
1986an Margaritak You ingeles eskola ireki zuen, Zumarragako Urdaneta kalean. «Etxean ikasle asko nituen eta lokala behar nuen. Eraikina egin eta berehala etorri ginen. Gustatu egin zitzaigun eta gurasoen etxetik gertu zegoen, gainera. Beatriz unibertsitatean zegoen oraindik. Turismoa ikasten ari zen, baina azkenean nirekin lan egiten gelditu zen», azaldu du.
Beste bi ahizpek ere, Yolandak eta Aliciak, ingeles eskolak eman zituzten. «Bost gara: mutil bat eta lau neska. Nik egun osoko lan jarduna nuen eta Beatriz, Yolanda eta Elsa txandaka ez ziren egunero etortzen. Yolandak Medikuntza ikasten zuen. Aliciak ere gurekin lan egin zuen, pare bat ikasturtetan. Egun bere ingeles eskola du, Gasteizen».
Legazpin ere bai
Zumarragako ingeles eskola ireki eta lau urtera Legazpikoa ireki zuten. «Legazpiko, Ormaiztegiko… jendea Zumarragara etortzen zen eta Legazpin ere eskola irekitzea erabaki genuen. Hemendik irakasle asko pasa dira. Batzuek urte asko eman dituzte gurekin». Zortzi lankide ziren eta egun zazpi dira, garbitzaileak erretiroa hartu baitu.
Zumarragako Urdaneta hiribideko ingeles eskolak 40 urte beteko ditu 2026an. Milaka ikasle pasa dira bertatik. Batzuk, oso ezagunak. Adibidez, Jose Ignacio Munilla: garai hartan Zumarragako parrokoa zen eta ondoren Donostiako gotzaina izan zen. Aitor Gabilondo Zumarragako alkate ohia eta Mikel Serrano Zumarragako alkatea ere You ingeles eskolako ikasleak izan zirela gogoratu dute Margarita eta Beatriz Bueno ahizpek.
Erretiroa
Margaritak otsailean utzi zion eskolak emateari. Beatrizek lanean jarraitzen du eta Irenek 27 urte ditu oraindik. Azken honek jaio zenetik ezagutzen du ingeles eskola eta gustuko du. Izan ere Ingeles Filologia ikasi zuen, oso gaztetatik You ingeles eskolan lan egin du eta, izebak erretiroa hartu duenean, enpresaren ardura hartu du. «Aukera bikaina da, oparia, baina baita lan zaila ere. Autonomoa izatea ez da erraza, langileak dituzu zure ardurapean, gogor borrokatu behar da… Institutuko irakaslea izatea errazagoa izango litzateke. Baina ingeles eskola betidanik ezagutzen dut eta lekukoa hartzea nire betebeharra zela uste dut. Oraingoz, pozik nago. Gainera, irakaslea izaten jarraitzen dut».
Margaritari ilusio handia egin dio bere ilobak lekukoa hartzea, noski. «Oso pozik nago, eskola esku onetan utzi baitut. Harro egoteko modukoa da. Oso pozik noa. Pribilegiatua sentitzen naiz: gustatzen zaidana egin dut eta ondo egingo duen baten esku utzi dut».
Aldaketak
Gauzak asko aldatu dira bera ingeles eskolak ematen hasi zenetik. «Irakaskuntza metodoak, teknologia berriak… Egokitzen saiatu gara beti eta Irene oso ondo prestatuta dago». Ikasleak ere asko aldatu dira. «Egungo gizartea duela 50 urtekoaren oso ezberdina da. Ni hasi nintzenean, ikasleek askoz ere gogo handiagoarekin ikasten zuten. Ez zituzten horrenbeste entretenimendu eta eskolatik kanpoko jarduera. Egun oso zaila da ikasleak motibatzea».
Bere iloba iritzi berekoa da. «Haur asko behartuta etortzen dira. Kosta egiten da ingelesa ikastearen garrantziaz jabetzea, gurasoek inbertsioa egiten ari direla ulertzea… Eskerrak azterketak ditugun. Azterketek ikasleak motibatzen laguntzen dute». Azterketek… eta 50 urteko ibilbideak.
