Gaur Emakumeen Aurkako Indarkeria Desagertarazteko Eguna da. Arratsaldean kontzentrazioa egin dute Areizaga-Kalebarren plazan. Ekitaldia Urola Garaiko Koordinadora Feministak antolatu du. Horra hor antolatzaileek irakurri duten testua:
“Heldu da berriz ere azaroaren 25a, eta horrekin batera indarkeria matxistaren aurka kalera ateratzekoa, enegarrenez. Gaurkoan, iazko azaroaren 25etik gaur arte eraildako sei emakumeak gogoratzen hasi nahi dugu irakurketa hau.
Indarkeria matxistaren aurpegi beldurgarri eta bortitzenaren biktimak gogoratu nahi ditugu. Euskal Herriko mugimendu feministako kideok maitasunez gogoratzen zaituztegu, ez zaituztegu bakarrik utziko. Besarkada bat ere zuen senitarteko eta lagunentzat.
Bestetik, Euskal Herriko mugimendu feministatik, urrian eta beste hainbat mobilizaziotan egin bezala, Palestinari gure elkartasun eta babesa adierazi nahi diogu, eta besarkada bat bidali palestinar herriari. Era berean, gobernuek Israelekin dituzten harremanak eteteko exijitzen dugu eta Israeli boikot egiteko deia egin. Aurrera Palestina!
Indarkeria matxista modu askotara ikusi dezakegu gure egunerokoan eta aurten indarkeria hori eusten duten egiturak eta konplizitate eta anaitasun sareak salatzera atera gara kalera.
Sistema kapitalista zisheteropatriarkal arrazista eta kolonialak askotariko egiturak eta mekanismoak ditu martxan gure gorputz eta lurraldeetan indarkeria betikotzeko eta, hala, sistema betikotzeko. Ematen dugun urrats bakoitzaren aurrean, oldarraldi berri bat jartzen da martxan, testuinguruaren arabera artikulatzen eta egituratzen dena.
Askotan, diskurtso antifeministak aurkitzen ditugu, bai eskuinarenak eta baita ezkerreko sektore erreakzionarioenak. Gorrotozko diskurtsoak eta feminismoaren aurkakoak inpunitate osoz hedatzen ari dira, sareetan, komunikabideetan eta kalean. Feministen aurkakoak, transfoboak, arrazistak…
Era berean, aipaturiko konplizitate eta anaidia sare horiek, paktu patriarkalak dira. Konplizitate eta isiltasun sareak dira, eta bertan gizonez gain, bestelako egiturek ere parte hartzen dute; indarkeria matxista lehen mailako arazo sozial eta politikotzat hartzen ez dituzten erakundeak, alegia, eta tartean, justizia sistema, non babesgabe eta inongo sinesgarritasunik gabe uzten gaituen etengabe.
Eta horrek guztiak kalean eragin zuzena du. Harreman zuzena du inpunitate osoz hedatzen ari diren diskurtso faxistekin. Feminismoari zilegitasuna kentzeko aliantza perfektua dira.
Bestetik, gaurkoan salatu nahi dugu askok feminismoa eta indarkeria matxistaren aurkako diskurtsoa darabiltela bestelako gorrotozko mezuak zabaltzeko, arrazakeria zabaltzeko, adibidez. Mugimendu feministaren borroka antiarrazista izan behar dela argi dugu, eta arrazakeria zabaldu nahi dutenen aurrean ere antolatuta egongo garela adierazi nahi dugu.
Era berean, sistema arrazista eta kolonialista betikotzen estrukturak salatzen jarraituko dugu. Atzerritasun Legea, adibidez.
Azkenik, aipaturiko guztiaren aurrean, erresistentzia feministarako deia egiten dugu. Segi dezagun antolatzen eta kaleak hartzen, segi dezagun autodefentsa feminista aldarrikatzen eta gauzatzen; kaleetan, etxeetan, lantokietan, jai guneetan… Erantzun diezaiogun indarkeria sostengatzen duten konplizitate sareei konplizitate sare feministekin.
Konplizitate sareen aurrean, erresistentzia feminista!
Gora borroka feminista!”.
