Urretxu-Zumarragako eta Legazpiko EAJk ospitaleko bloke kirurgiko berriaren obren hasiera ospatu dute
Urretxu-Zumarragako eta Legazpiko EAJk Zumarragako Ospitaleko bloke kirurgiko berriaren obren hasiera ospatu dute. Prentsa ohar bat bidali dute komunikabideetara eta bertan bere poza azaltzen dute.
“Inbertsioa 75 milioi eurokoa izan da eta Eusko Jaurlaritzak eskualde osoan osasun arreta modernizatzeko hartu duen konpromisoa sendotu du. Eusko Jaurlaritzak eta Osakidetzak bultzatutako proiektu estrategiko honek Goierriko eta Urola bailarako osasun arreta indartuko du, Zumarraga, Urretxu, Legazpi eta inguruko herrietako bizilagunei zuzenean mesede eginez.
Bloke berriaren eraikuntzak, 58 milioi euroko inbertsioa izango du obra zibilean eta 17 milioi euro zuzkidura teknologikoan eta ekipamenduan. Eskualdeko osasun zerbitzuak errotik aldatuko ditu. Aurreikuspenen arabera, 2028ko abenduan amaituko da proiektua, eta 17.000 metro koadro hartuko ditu zortzi solairutan banatuta, mundu mailako instalazioak barne.
Gune berriak 9 ebakuntza gela moderno ditu (daudenez gain, beste 5), hemodialisirako 18 postu espezializatu, 4 endoskopia gela, eskualdeko Minaren Unitate bat eta Eguneko Ospitale Mediko bat. Azpiegitura horiei esker, Zumarragan kokatuta dagoen ospitala osasun erreferentzia bihurtuko da eskualde osoan.
Proiektu hau jauzi kualitatibo erabakigarria da eskualdeko osasungintzan, eta eragin positiboa izango du ondorengo arloetan: kirurgiako eta diagnostikoko itxarote denborak nabarmen murriztea, asistentzia zirkuituen optimizazioa eskualde osorako, bertako osasun langileen lan baldintzak hobetzea, Zumarragako, Urretxuko eta inguruko udalerrietako biztanleentzako azpiegiturak modernizatzea eta asistentzia gaitasun handiagoa Goierriko eta Urola Garaiko herritarren beharrei erantzuteko.
Egungo proiektua 1970eko hamarkadan abiatutako ibilbide baten barruan kokatzen da, orduan hasi baitziren inguruko alkateak (Cruz Maria Uribesalgo, Ramon Maiztegi, Juan Carlos Lamsfus hasieran eta Juan Garitano, Juanito Arbizu, Jose Luis Ruiz, Prontxio Larrañaga, Fran Urrestilla, Anton Arbulu eta beste asko ondoren) Goierriko guraso elkarteekin batera eskualdeko osasun egoitza bat eskatzen. Lan bateratu hura gauzatu egin zen 1977an, Zumarragako Udalak lursailak eraikitzeko eskaini zituenean, eta urteetako izapideen ondoren, ospitaleak ateak ireki zituenean, 1984an. 40 urte geroago, inbertsio berri honi esker, eskualdeko osasun publikoarekiko hasierako konpromisoa eguneratu eta indartu egin da.
Eusko Jaurlaritzak, EAJ buru duela, osasun publiko moderno eta hurbilarekin duen konpromisoa berresten du. Proiektuaren aurkezpenean izan ziren Alberto Martinez Osasun sailburua, Lore Bilbao Osakidetzako zuzendari nagusia eta Laura Agirre Goierri–Urola Garaiko ESIko zuzendari gerentea, eskualdeko udalerrietako ordezkari instituzionalekin batera.
Obra hauen hasierarekin, EAJk Urola Garaia eskualdeko osasun garapenerako polo gisa indartzeko apustua berresten du, gure auzokideen bizi kalitatea eta eskualdeko garapen sozioekonomikoa Eusko Jaurlaritzaren lehentasunak izan daitezen bermatuz”.
