Bi-Tartean elkarteak Gabonetako kanpainia abiaraziko du astelehenean Herrian erostearen magia leloarekin. Kanpainaren helburua gertuko merkataritzaren balioa azpimarratzea, hiri paisaia atseginagoa egitea, merkataritza markaren irudia sendotzea eta tokiko kontsumo ohiturak indartzea. Opari banaketa, opari zozketa, haurrentzako jolasa eta erakusleiho lehiaketa antolatu dituzte, besteak beste. Gainera, Galtzagorri pertsonaia sortu dute.
Kanpaina gaur aurkeztu da Areizaga-Kalebarren plazan. Bertan, Olentzero eta Mari Domingi erraldoiak jarri dituzte. Urtarrilaren 6ra arte izango dira bertan. Bestalde, gaur arratsaldean Gabonetako argiak piztuko dira.
Astelehenetik aurrera dendetako erakusleihoak apainduta egongo dira eta dendariek txartelak banatuko dituzte (hilaren 19ra arte). Horietako batzuek sari zuzena izango dute. Gainerakoak abenduaren 19ko zozketarako gorde beharko dituzte herritarrek. Zuzeneko saria duten txartelak erosketa bale gisa funtzionatuko dute. Momentuan ikusiko du txartela jasotzen duen pertsonak saria egokitu zaiola. 20 euroko erosketa balea izango da eta, dirua bailitzan, kanpainara atxikitako establezimenduetan erabili ahal izango du (bertan dagoen QR-an ezagutuko ditu establezimenduak).
Zuzeneko saririk gabeko txartelak zenbakituta egongo dira eta abenduaren 19an egingo den Olentzero eta Mari Domingiren zakuaren zozketan parte hartzeko balioko dute. Horretarako, zakuan sartzeko txartelaren zatia zakura bota eta bestea gainean eraman beharko dute parte hartu nahi dutenek. Txartelak zakura zozketa egunean bertan ere bota ahal izango dira, 19:00tatik 20:00etara. Zozketa 20:00etan izango da.
200 euroko erosketa bonu bat, 100 euroko bi eta 50 euroko bi zozkatuko dituzte. Zozketan bost zenbaki aterako dira. Irabazlea bertan egon beharko da eta zenbaki saritua erakutsi beharko du saria jaso ahal izateko. Irabazlea bertan egongo ez balitz, beste zenbaki bat aterako litzateke, guztira bost saridun egon arte. Saritutako erosketa bonuak kanpainara atxikitako establezimenduetan bakarrik erabili ahal izango dira, abenduaren 31ra bitartean.
Bestalde, abenduaren 3an, Euskararen Egunean, LH5 eta DBH2 arteko gaztetxoek street scape batean jolastu ahal izango dute Urretxu eta Zumarragako dendetan. Parte hartzaileak 17:00etan elkartuko dira Zumarragako plazan eta 18:00etara bitartean gaztetxoek hainbat proba egin beharko dituzte herriko dendetan. Bi-Tartean merkatari elkarteak 50 euroko sei bonu zozkatuko ditu probak zuzen egiten dituztenen artean. Zozketa Zumarragako plazan izango da, 18:05ean.
Astelehenera arte izango da zabalik izena emateko epea. Udaletako webguneetan eta sare sozialetan zabaldu dira izena emateko orriak. Labur.eus/streetuz helbidean ere eman daiteke. Ekitaldi horren helburua merkatarien eta gaztetxoen arteko harremana euskaraz izatea eta gaztetxoek herrian duten eskaintza zabala ezagutzea da. Izan ere, komunitatea euskaraz saretzeko ardatz garrantzitsua dira merkatariak.
Aipatu bezala, merkatariek eta udalek erakusleiho lehiaketa ere antolatu dute. Abenduaren 16ra arte, herritarrek beren erakusleiho gustokoenaren alde bozkatu ahal izango dute. Sari banaketa ekitaldia hilaren 18an izango da.
