Zumarragako EH Bilduk Mertzedariekin, kiroldegiarekin, osasun komunitarioarekin eta aniztasunarekin lotutako urratsak ematea proposatu du
Zumarragako EH Bilduk hainbat esparrutan “urrats estrategikoak emateko” ekarpenak aurkeztu ditu 2026ko aurrekontuen lanketan: zaintza ekosistema publiko komunitarioa sendotzea, kirol azpiegituren egokitzapenari ekitea, aniztasunaren kudeaketa integrala garatzea eta osasun komunitarioa sustatzea. Horra hor EH Bilduk komunikabideetara bidali duen oharraren edukia:
“Helburua argia da: herri inklusibo, kohesionatu eta ongizatean oinarritua eraikitzea. Lau ekarpen aurkeztu ditugu 400.000 eurotako kopuruarekin eta Zumarragako aurrekontu proiektuak dituen mugak ikusirik 2025eko soberakina baliatzeko aukera ere eskaini diogu udal gobernuari.
Adinekoen kopurua handitzen ari den testuinguruan, Zumarragak zaintza eskubide unibertsala bermatzeko premia du. Horretarako, udalak Mertzedarietako eremuan zaintza ekosistema bat garatzeko diagnostikoa egitea proposatzen dugu. Helburu nagusietako bat Mertzedarietako Kongregazioarekin akordio bat lortzea da, espazioaren erabilera partekatua ahalbidetuz eta, lehen urrats gisa, eguneko zentro irisgarri bat bertan kokatzea aztertuz.
Ispilla kiroldegia: eguneroko premietatik etorkizuneko berrikuntzara. Ispilla kiroldegiak 38 urte bete ditu eta egiturazko gabeziak nabarmendu dira: aldagelen eskasia, gradaren egoera, harreraren kokapena edota itokinak. Kirol talde eta erabiltzaileen beharrak handitzen ari direnez, udalak azpiegitura beharren diagnostiko sakona egitea proposatzen dugu, eta hortik abiatuta, Ispilla berritzeko proiektua edota azpiegitura berrien diseinua lantzea. Aldi berean, premiazko mantentze neurriak ere abiatzeko bide orri bat egitea eskatzen dugu.
Zumarraga, harrera eta aniztasunaren herria. Udalak Aniztasun Plan Integrala garatzeko konpromisoa hartzea nahiko genuke, herritarrekin eta eragileekin elkarlanean. Iritsi berriei zuzendutako harrera protokoloa eskaintzeko, euskarara sarbidea erraztuko duten programak indartuz eta sentsibilizazio eta komunikazio ekimenak martxan jarriz. Gainera, kultura
ezberdinen arteko elkar ezagutza sustatuko duten jarduera egitaraua garatzea proposatzen dugu.
Osasuna ikuspegi komunitariotik: Urolako geltokia topagune berria. Osasuna ez da soilik osasun sistemaren ardura; komunitate osoarena baizik. Horregatik, osasun komunitarioko estrategia bat sortzea eta osasun kontseilua eratzea proposatzen da. Urolako tren geltokia espazio egokia da herritarrentzako orientazio eta topagune osasungarria garatzeko, ingurunearekin eta gainerako
zerbitzuekin konektatuta.
Lan ildo hauen inguruan Zumarragako EH Bilduk udal gobernu taldeari eskua luzatzen dio, iaz bezala, aurrekontuetan akordio bat lortzeko helburuarekin. Zumarragak behar dituen ildo estrategiko hauetan denon elkarlana ezinbestekoa izango baita”.
