Udaberrian pabiloiak eraisteari ekingo dio
Morez, Sprilurrek botako dituen eraikinak. Eusko Jaurlaritzako Industria, Trantsizio Energetiko eta Jasangarritasun Sailak, Sprilurren bidez, fase berri bat bultzatuko du Zumarragako altzairutegi zaharraren industria eremua berroneratzeko prozesuan, antolamenduz kanpoko hainbat eraikin eraitsita. Abenduaren 12an Sprilurrek 568.779,29 euroko eraispen lanak lizitatu zituen eta eskaintzak aurkezteko epea 2026ko otsailaren 9ra arte egongo da zabalik.
Aurreikusitako jarduerak Zumarragan egingo dira batez ere, 9.528,12 metro koadrotan. Urretxun 1.135,35 metro koadroko lursail batean lan egingo da. Proiektuaren arabera, eraikin industrialen eta osagarrien multzo bat (aldagelak, bulegoak eta bost pabiloi handi) eraitsiko dira. Sortutako hondakinak bertan bereiziko dira eta kudeatzaile baimenduek kudeatuko dituzte, fibrozementua bezalako materialen tratamendu espezifikoa barne.
Laster, Sprilurrek urbanizazio proiektuak, sarbideak, ibaiaren azaleratzea eta Kaminperako bideko proiektuak aurkeztuko ditu.
Zumarragako EAJ pozik ageri da. “Jarduera horiekin, Sprilurrek beste urrats bat eman du enklabe estrategiko hori eraldatzeko eta berreskuratzeko prozesuan, eskualdean jarduera ekonomiko berriak garatzeko eta enplegua sortzeko oinarriak ezarriz”.
