Gaurko Zumarragako osoko bilkura Josu Aztiria EH Bilduko zinegotziaren azkena izan da. Aztiriak karguari uko egin dio, legebiltzarkide lanarekin bateraezina zaiolako. EH Bilduko kideak osoko bilkurara joan dira eta amaieran lore sorta oparitu diote.
Bai Aztiriak eta bai gainontzeko alderdietako kideek hitza hartu dute. Aztiria hunkituta azaldu da. “Ez nuen zuen bisita espero. Oso zaindua sentitu naiz eta oso eskertuta nago. Oso harro nago osatu dugun komunitateaz”.
Udalbatzako gainontzeko kideei ere eskerrak eman dizkie. “Eskerrik asko udaleko gainontzeko kideei. Zorte onena opa dizuet. Eskerrik asko udal langileei ere, bereziki Luciari (Okariz) eta Agurtzaneri (Basabe) zuen prestutasunagatik. Eskerrik asko ere kazetariei, herritarrei eta elkarteei”.
Alderdikideak bereziki gogoratu ditu, noski. “Eskerrik asko ni zaintzeagatik. Jarraitu zaintzen, entzuten, herria egiten. Aimarri zorte onena opa diot. Zinegotzia izatea, herria ordezkatzea, ohorea da. Hori dela eta, herritarrak zinegotzi izatera animatu nahi ditut. Lana ematen du, baina gozatu ere egiten da. Ohorea da EH Bildun aritzea. Bide onetik goaz. Legebiltzarkidea banaiz, komunitateari esker eta zinegotzi bezala egin dudan lanagatik da. Muxu handi bat zuei eta zumarragar guztiei”.
Aritz Elgarresta alderdikidea izan da hitza hartu duen hurrengoa. “Eskerrak eman nahi dizkizugu egin duzun lanagatik. EH Bilduk Zumarragan izan duen garapena ezin da ulertu zu gabe. Harro egon zaitezke egin duzun lanarekin. Bide honetan benetako lagun bat aurkitu dut. Gaitasun handiko pertsona zara. Ez da sorpresa izan zu legebiltzarrera heltzea. Gasteizen Zumarragan dugun altxor bat deskubritu dute. Ez agur eta ez gero arte, lan taldeko kide izaten jarraituko baituzu”.
EAJko Josu Idigorasek ere Aztiria goraipatu du. “Ibilbide berrian ondo moldatzea espero dut. Balioan jarri nahi dut nolakoa pertsona zaren. Espero dut Gasteizen ere herriaren alde lan egitea”. Hitza azken azkena Mikel Serrano alkatea izan da. “Zorterik onena opa dizut. Segi Zumarragaren alde lanean Gasteizen eta joaten zaren gainontzeko tokietan. Gauza askotan ez gara ados egon, baina zorionak eta eskerrik asko egin duzun ekarpenagatik”.
