Urretxu eta Zumarragako Euskara zerbitzuek Aroz Aro egitasmoaren neguko eskaintza aurkeztu dute Zelai Arizti aretoan. Ekitaldian Alex Gonzalez Urretxuko Udaleko Euskara batzordeburuak, Josu Idigoras Zumarragako Udaleko Euskara batzordeburuak eta Marijo Etxeberria udal euskaltegiko transmisio gaietarako koordinatzaileak parte hartu dute.
Hitza hartzen lehena Idigoras izan da. «Joan den udazkenean hainbat ekintza antolatu genituen, besteak beste Gau Beltzari lekua egin genion herri mailan euskaraz eta euskaratiik. Euskararen Egunaren bueltan ere hainbat ekintza burutu genituen, bai geuk antolatuta, bai Zintzo Mintzo euskara elkarteari lagunduta ere zuon, herritarron, erantzun beroa izan zutenak», aipatu du. Ondoren, Gonzalezi eman dio hitza.
Gonzalezek iaz Urretxura eta Zumarragara Euskal Herritik kanpotik etorri eta erroldatu zirenei 10 orduko euskara ikastaro bat doan eskaini dietela aipatu du. «Helburua euskararekin lehen harremantxo bat izatea da. Programa horri 2010-2011 ikasturtean ekin genion. Helduei zuzenduta dago, 16 urtez azpikoak eskoletan daude eta. Programa hasi genuenetik 200 bat herritar pasatu dira bertatik, eta 10 orduko moduluan hasten diren askok eta askok, ondoren eskaintzen diegun AISA 60 orduko moduluan ikasten jarraitu ohi dute».
Etxeberriak ikastaroaren berri zabalagoa eman du. «Ikastaroaren helburua gurera etorri berri diren eta orain arte euskararekin inongo harremanik izan ez dutenak euskarara hurbiltzea da. 10 ordu horietan hiztegia, aurkezpena, zenbakiak… lantzen ditugu. Oinarrizko kontzeptuak. Gure bi herrietan euskara erabiltzen dela jakinarazi nahi diegu».
Zinea
Haurrentzako zine emanaldiak ere antolatu dituzte. Gonzalezek aurkeztu ditu. «Eskola orduetan izango dira, Tinkoren eskutik, Haur Hezkuntzako eta Lehen Hezkuntzako ikasleentzat. Urtarriletik martxora, Robotia, Bram Barrabas, Igela & Zapoak eta ZOG pelikulak emango dira».
Horretaz gain, hilaren 31n Goazen! musikalaz gozatu ahal izango dute Zelai Arizti aretoan. Bi txanda izango dira: 17:00etan lehena eta 19:00etan bigarrena. «Iazko Aroz Aroko bilera parte hartzailean izandako eskaera bati erantzunez, urtarrilaren 31n telebistako Goazen! telesail arrakastatsuaren saio musikatua izango dugu Zelai Arizti antzokian. Sarrerek 8 euro balio dute eta dagoeneko 650 sarrera inguru saldu dira, baina oraindik ehun inguru geratzen dira: 50 sarrera inguru txanda bakoitzeko. Sarrerak Zelai Ariztiko webgunean, antzoki kanpoko makinan edota leihatilan eros daitezke».
2035a jomugan
Bestalde, Urretxu eta Zumarragako udalek Euskara Plana diseinatu behar dute, datozen bederatzi urteetara begira. Herritarrekin elkarlanean diseinatu nahi dute eta 2035ari begira jarri dira. Idigoras arduratu da egitasmo hori aurkezteaz. «Non egon nahi genuke 2035ean? galderari erantzun behar diogu. Horretarako, Elhuyar enpresak lagunduta, datorren astean galdetegi bat zabalduko diegu herritarrei, bost bat minutuan erantzutekoa. Horrez gain, hainbat herritarri elkarrizketa bat egingo zaie otsailean diskurtso ezberdinak biltzeko, eta Aste Santu ondoren, bildutako informazioarekin plana diseinatzeari ekingo diogu».
Lehiaketa
Mingainluze lehiaketaren berri ere eman dute. Otsailaren 7an izango da (eta 8an, beharko balitz), Labeaga aretoan. Aurten ere, LH5eko ikasleek telebistako Mihiluze saioko lehiaketaren modukoa den Mingainluzen parte hartzeko aukera izango dute. Izen-ematea gaur irekiko da eta LH5eko ikasleek hiruko taldetan parte hartu beharko dute.
Korrika
Gonzalezek Korrikaren ingurukoak ere azaldu ditu. «Aurten, martxoaren 28an, larunbata, pasako da Urretxu-Zumarragatik. 07:44an Urretxun sartuko da Deskargatik eta Zumarragatik Ezkiora 08:10 aldera joango da. Asteburua borobiltzeko, Korrika iritsi bitarteko ekintzak antolatu nahi dira. Horetarako, Korrika Batzordea deitu du AEK-k Urretxu-Zumarragan datorren urtarrilaren 28an, 18:30ean. Bi udaletako Euskara zerbitzuak ere bertan izango gara eta prentsaurreko hau baliatu nahi dugu interesa duten herritar guztiak bertara gonbidatzeko».
Bukatzeko, Idigorasek euskarazko ikuskizun eszenikoen berri eman du. Helduei zuzendutako bi ikuskizun izango dira: ostiral honetan Lana eta martxoaren 6an Zorretan. Biak Zelai Arizti aretoan izango dira. Haurrentzako emanaldiei dagokienez, hiru izango dira: hilaren 25ean Moko, otsailaren 22an Erbia eta dordoka eta martxoaren 28an Zerua lapurtu dute.
