1990eko hamarkada erdialden errugbi taldea izan zen Urretxun eta Zumarragan, baina gutxi iraun zuen. Multikirola programaren eskutik, haurrek errugbian jokatzeko aukera dute berriro.
Pilotak, txirrindularitzak, futbolak, saskibaloiak, eskubaloiak… tradizio handia dute Urretxun eta Zumarragan. Beste kirol batzuk indar gutxiago dute eta bada garai batean presentzia izan eta herritik desagertu zen kirolik ere. Horien artean errugbia dago. 1990eko hamarkadaren erdialdean errugbi taldea izan zen bi herriotan. Gutxi iraun zuen, ordea. Ikastetxeetako Multikirola programaren eskutik, herriko haurrek errugbia ezagutzeko aukera dute berriro.
Beharbada haur horietako batzuei kirol hori asko gustatuko zaie eta gurasoek errugbi taldea sortzea erabakiko dute. Nork daki… Norbaitek inspirazioa behar badu, horra hor Urretxun eta Zumarragan egon zen lehen errugbi taldearen nondik norakoak.
Taldea sortzearen ideia Jose Luis Andikoetxearena izan zen. Urretxura eta Zumarragara etorri aurretik, Gernika errugbi talde ospetsuan jokatu zuen. Urretxu-Zumarragan lan egitea egokitu zitzaion eta hemen ez zegoen errugbi tradiziorik, baina ez zuen bere kirol kuttuna egiteari utzi nahi. Hori dela eta, errugbi talde bat eratzea pentsatu zuen. Bi herrietako kaleetan kartelak jarri zituen eta ez ziren gutxi izan izena ematea erabaki zuten urretxuar eta zumarragarrak. Hala, taldea osatzea lortu zuten. Lehen pausoa errugbiaren arauak ikastea izan zen. Ondoren, entrenatzen hasi ziren eta pixkanaka adiskidantzako partiduak jokatzeari ekin zioten.
Gazteak eta seniorrak
Bi talde zeuden: gazte mailakoa eta nagusiena. Gazte mailako taldean 20 bat jokalari zeuden eta nagusien taldean 25 bat. Astean behin entrenatzen zuten, Zumarragako Argixao futbol zelaiko anexoan. Taldeko batzuk astea herritik kanpo ematen zutenez, ostiraletan bakarrik entrenatu zezaketen. Partidak Urretxuko Elizalde zelaian jokatzen zituzten. Urretxuko Udalak errugbirako egokitu zuen, baina ez zegoen aldagelarik bertan.
Inork gutxik ezagutzen zuen kirola, entrenamendu bakarra astean, harri txintxarrez jositako zelaietan entrenatu eta jokatu beharra… Ia dena aurka zuten. Urretxuko eta Zumarragako errugbi taldeak ez zituen oso emaitza onak lortu eta abenturak ez zuen asko iraun. Nagusien taldeak partida bakarra irabazi zuen (denboraldian zehar entseguren bat edo beste egitea lortu zuten, behintzat) eta denboraldi amaieran bi herriotako errugbi taldea desagertu egin zen.
30 urte pasa dira ordutik, baina parte hartu zutenek ez dute bizitakoa ahaztu: kirol berri bat ezagutu zuten, lagunak egin zituzten, primeran pasa zuten… Horiek dira, hain zuzen ere, ikastetxeetako Multikirola programaren helburuak. Horregatik erabaki dute errugbia berriro Urretxura eta Zumarragara ekartzea. «Errugbiaren laugarren ikasturtea da. Bailarako hainbat umek eta gaztek Ordizia Rugby taldean jokatu dutela ikusita, gainontzekoei ere errugbia ezagutzeko aukera eman nahi diegu», azaldu du Asier Auzmendik, Urola Garaiko Multikirola programako koordinatzaile orokorrak.
Multikirolako haurrek zapi errugbian jokatzen dute. «Mundu mailan tag rugby bezala ezagutzen dena kontakturik gabe jokatzen da. Oso araututa dago», aipatu du.
Haurrak, gustura
Ikasturte honetan inoiz baino denbora gehiago eskaini diote errugbiari. «Hiru astetan zehar entrenamenduak egin ditugu ikastetxeetan eta ondoren jardunaldi bat egin dute guztiek elkarrekin Urretxuko Aldiri kiroldegian. Ordizia Rugbyko kideek epaile lana egin dute. 220 haur inguruk parte hartu dute. Errugbiari inoiz baino denbora gehiago eskaini diogunez, errugbiaren dinamika hobeto ulertu dute eta gehiago gozatu dute», amaitu du Auzmendik.
1990eko hamarkada erdialdeko errugbi taldea. Goian, ezkerretik eskuinera: Joseba Guridi, Juanjo Aranburu, Jesus Junquera, Txues, Txus, Pablo Berriotxoa, Diego Bilbao, Agirrezabal eta Joseba Segurola. Behean, ezkerretik eskuinera: Ito, David Bilbao, Joxemi Alvarez, Andy, Ibon Araiztegi, Lazaro eta Jonan Torquemada. Pika, Joseba Iturbe, Kaspe, Gerar, Zabalo, Uli, Jaro eta Andi legazpiarrak ere jokatzen zuten, besteak beste.
