Ataungo mozorro zuri makil-dantza oinarri hartuta osatu dute ibilbidea Iparragirre plazatik Santa Barbararaino.
Urretxuko Lurra dantza taldekoak Etxaburun. Txokolate beroarekin eta gozoekin egin die harrera etxekoandreak. Atzo azken entsegutik irten zirenean botatzen ari zen erauntsiak gaurkorako zalantza sortu bazien ere, urteroko hitzorduari eutsi diote gaur Urretxuko Lurra dantza taldekoek. Urtero euskal inauteri bat hartzen dute gaitzat, eta aurten Ataungo mozorro zuri makil-dantza izan da.
Iparragirre plazan lehen saioa egin eta taldeko argazkia atera ondoren, baserrietarako bidea hartu dute. Etxaburun egin dute lehen geldialdia, eta euritan egin dute saioa. Txokolate beroarekin eta gozoekin egin die harrera etxekoandreak. Atertu eta euri hasi, horretan aritu da eguraldia, eta taldean zalantzak sortu baditu ere, bitan banatu eta baserriz baserri aurrera jarraitzeko erabakia hartu dute, azpiko arropak beraiek ere bustita bazituzten ere.
Eguerdirako Zabaleta baserrira iritsi dira, eta hango hamaiketakoa eta berotasuna eskertu dute. Hauxe da egin duten ibilbidea: udaletxe aurrea, Etxaburu, Erratzu, Zuloaga, Iturbe Behekoa, Beibakar, Zabaleta, Agerre, Mendizabal, Ipeñarrieta eta Santa Barbara.
