Gainzuri ikastetxeak patioaren zati bat estaliko du. Esku-hartzea gaur egun kirol pista dagoen eremuan egingo da, patioa urte osoan erabili ahal izatea bermatzeko, eguraldiaren gorabeherak gorabehera. Obrak otsailean hasiko dira eta irailerako amaitzea aurreikusten da. Proiektuaren aurrekontua 700.000 eurokoa da.
Egitasmoa Soroa Arquitectos eta Zebra Lab Arquitectura bulegoek idatzi dute, Eusko Jaurlaritzako Hezkuntza sailaren enkarguz. Ikastetxeko zuzendaritzak aspaldi helarazi zion beharra Urretxuko Udalari (lurraren titularra) eta hezkuntza komunitate osoak partekatutako eskaera izan da: kanpoan, baina babestuta, jarduerak egiteko gune egonkor bat izatea.
Estalki berriak aukera emango du atsedenaldiak, gorputz hezkuntzako saioak eta bestelako jarduerak euria ari duenean ere normaltasunez egiteko. Horrela, patioaren erabilera handitu egingo da eta eguraldi txarrak ez du eskola egunaren garapena baldintzatuko.
Estalkiak 25×20 metroko neurria izango du. gutxi gorabehera.502 metro koadro estaliko ditu. Altuera libreari dagokionez, 6,03 eta 7,67 metro artekoa izango da. Horri esker, kirol jarduera oztoporik gabe egin ahal izango da.
Proiektuaren ezaugarri nabarmenetako bat zutaberik ez duela da. Horrela, pistak bere osotasuna eta malgutasuna mantenduko ditu, bai jolaserako, bai jarduera didaktikoetarako.
Eraikuntza ikuspegitik, egiturak hormigoi armatua eta tratatutako pinu radiata egur laminatua uztartuko ditu. Oinarriak hormigoizkoak izango dira, erabilera intentsiboari aurre egiteko. Goiko egitura, berriz, egurrezkoa izango da: iraunkortasuna, sendotasuna eta irudi atsegin eta garaikidea bateratuko ditu.
Estalkia eta goiko itxiturak, berriz, polikarbonato zelular zuri zeharrargizko panelekin egingo dira. Horri esker argi naturala barrura sartuko da. Emaitza espazio estali, argitsu eta atsegina izango da, ikastetxearen ingurunean ondo txertatua.
Lanek, gainera, euri uren hustubide sistema egokitzea, kaltetutako zoladurak berritzea eta harkaitzean ainguratutako mikropilote bidezko zimendatze sakona egitea aurreikusten dute, lurzoruaren ezaugarriei eta lursailaren maldari egokitutako konponbide teknikoarekin.
Halaber, patioaren iparraldeko ezpondan bi harmaila eraikiko dira, gaur egun erabilerarik ez duen gunea topaleku bihurtzeko. Estali gabe geratuko den eremuan, etorkizunean, patio inklusibo bat egokitzea aurreikusten da.
Obra hau azken urteotako plangintzaren eta erakundeen arteko lankidetzaren emaitza da. Gainzuri ikastxea eta Iparragirre institutua Eusko Jaurlaritzaren 2019-2023 Hezkuntza Azpiegituren Planaren barruan sartu ziren, eta horri esker, 1,5 milioi eurotik gorako inbertsioak aktibatu dira bi zentroetarako.
Gainzuriko estalkiaren lanekin, duela sei urte hasitako prozesuari amaiera emango zaio. “Berriro ere agerian geratuko da udalaren konpromisoa: eskola publikoaren azpiegiturak hobetzea eta ikasleentzat zein hezkuntza komunitatearentzat ingurune seguru eta egokiak sortzea”, azaldu dute udaletik.
