Zumarragako Udalak autoa partekatzeko proiektu pilotu bat jarri du martxan, Tribbu aplikazioaren bidez. Ekimena gaur egungo autobus eta tren loturak osatzeko sortu da, herritarrak unibertsitatera, lanera edo aisialdira modu erraz eta jasangarrian joan daitezen ahalbidetuz. Hala, CO2 isurpenak murrizten lagunduko du. Bidaia bakoitzeko hobari ekonomikoa eskainiko du. Hasiera batean, udalak 1.800 euroko inbertsioa egingo du eta diru horrekin 3.600 ibilbide diruz lagundu ahal izango dira.
Tribbu sakeleko telefonoko aplikazio bat da, komunitate bereko pertsonen mugikortasun partekatua sustatzeko diseinatua. Autoz ibilbide bat egin behar dutenek leku libreak eskaini diezazkiete noranzko berean joan nahi dutenei. Desplazamendu motz eta errepikakorretarako pentsatuta dago. Aplikazioaren bidez, gidariak bere ibilbidea argitaratzen du (jatorria, helmuga eta ordutegia adieraziz) eta interesdunek plaza bat eska dezakete. Plataformak bi aldeak harremanetan jartzen ditu eta dagozkion konpentsazio ekonomikoak kudeatzen ditu. Hala, ibilgailuen erabilera optimizatzen da, kostu indibidualak murrizten dira, zirkulazioan dauden autoen kopurua murrizten da eta horrek trafikoaren segurtasuna handitzen du. Aplikazioa intuitiboa da eta, beraz, erabilerraza.
Zumarragaren kasuan, udalak bere komunitate propioa sortu du aplikazioaren barruan. Komunitatea dagoeneko eskuragarri dago Zumarragako Udala izenpean. Aplikazioa deskargatu eta erregistratzeko prozesua amaitu ondoren, Zumarragako Udalarentzat sortutako komunitatearen parte izateko, ondorengo bidea jarraitu behar da: Menua > Nire enpresa/Unibertsitatea > Bilatu “Zumarragako Udala” > Sartu ZUMARRAGA26 kodea.
Proiektu horretan, Tribbu aplikazioak, Espainiako Gobernuko Trantsizio Ekologikorako eta Erronka Demografikorako Ministerioarekin elkarlanean, bidaia partekatuagatiko konpentsazio ekonomikoa jasotzen du. Horri esker, gidariek 0,04 euro kilometroko ordaina jasotzen dute bidaiari bakoitzeko. Horretaz gain, Zumarragako Udalak bidaiari bakoitzeko 0,50 euroko hobaria emango dio gidariari, jatorria eta helmuga Zumarraga duten ibilbideetan. Hasierako udal inbertsioa 1.800 eurokoa da, eta horri esker, sortutako komunitatearen barruan 3.600 bidaia partekatu diruz lagunduko dira. Neurri horren helburua trafikoa eta kutsadura murriztea eta joan-etorriak zero kostuan egin ahal izatea da (gidariak hala erabakitzen badu).
Iñaki Mendiluze Gazteria zinegotzia pozik azaldu da egitasmoaren aurkezpenean. “Ekimen honekin beste urrats bat ematen dugu dauden garraio zerbitzuak handitu eta osatzeko, gure bizilagunen egunerokoa erraztuz. Mugikortasun pribatua ere demokratizatzea funtsezkoa da gazteek beren bizi proiektua Zumarragan finkatu ahal izateko. Mugikortasuna ezin da oztopo bihurtu ikastea erabakitzen duenarentzat edo beste udalerri batean lan egiten duenarentzat. Pertsona guztiok dugu erabat garatzeko eskubidea, nahiz eta gure eguneroko jomugak zuzeneko konexiorik ez izan autobusez edo trenez”.
Egitasmoa onura asko dituela gehitu du. “Lehenik eta behin, ingurumen onurak, CO emisioak murrizten baitira eta airearen kalitatea hobetzen baita. Bigarrena, segurtasunekoa, zirkulazioan dauden ibilgailuen kopurua murrizten delako,. Eta hirugarrenik, bidaiariarentzat aurrezki ekonomikoa eta gidariarentzat diru sarrera sortzen du. Baina ezin dugu alde batera utzi gako garrantzitsuena: autoa partekatzeak, baliabideak optimizatzeaz gain, lankidetza kultura sustatzen du, komunitatea ehuntzen du eta garraioa Gipuzkoako barnealdeko herrien benetako gizarte kohesiorako tresna bihurtzen du”, nabarmendu du Mendiluzek.
