Zumarragako Udalak Gure-Txokoko eta El Salvadorreko tabernak ustiatzeko kontratazio espedienteak onartu ditu
Alderdi guztiek alde bozkatu dute
Zumarragako Udalak Gure-Txoko jubilatuen etxeko eta El Salvador gizarte etxeko tabernak ustiatzeko kontratazio espedienteak onartu zituen astearteko osoko bilkuran. Alderdi guztiek alde bozkatu zuten.
Esleipendunak 350 euro ordainduko du hilero. Kontratua bost urtekoa izango da (bi urte eta ondoren urtero luzatuko da). Helburua ahalik eta zerbitzu onena eskaintzea da, bereziki adinekoei. Mikel Serranok egungo arduradunari (Barrenetxe JO 1964) eskerrak eman zizkion eta berriek egungoek bezain ondo lan egitea espero dutela esan zuen.
EH Bilduko Aritz Elgarrestak kontratazio espedientea zazpi urteko atzerapenarekin onartu dela esan zuen. “Egoera erregularizatuko duten pleguak dira, aurrekoan txostenik gabe esleitu baitzen. Kontratu ezberdinak aztertzen ari ginela, Gure-Txokoren esleipenak ez zuela amaiera datarik ikusi genuen. Alkateari galdetu eta hastear zirela erantzun zigun. Gure ustez, galdetu genuelako jarri ziren martxan. A dedo esleitu zen. Oso larria da. Prebarikazioa izan daiteke”.
Asteartean aho batez onatu zen kontratazio espedientea. “14 ekarpen aurkeztu genituen, lan eskerga eginez. Ekarpenak gobernu taldearekin adostu genituen. Gobernu taldearen jarrera positiboa izan da oraingoan”, gehitu zuen Elgarrestak.
Jarraian, EH Bilduren ekarpenen berri eman zuen. “Pleguetan adinekoekin lotutako ostalaritzan esperientzia izatea baloratzen zen eta guk atzera bota genuen. Ostalaritzan esperientzia izatea soilik eskatuko da. Horrek herriko ostalariei ateak irekiko dizkie. Bestela, egungoari erraz jartzea zen. Horretaz gain, udalak euskara ikastaroa eskainiko die langileei”.
Mikel Serrano alkateak azken zazpi urteetan non egon diren galdetu zien. “Ez al zitzaizuen jubilatuen egoitzako taberna interesatzen? Gai hau ez da zuen galderengatik jarri martxan. Garrantzitsuena kalitatezko zerbitzua eskaintzea da. Beste herri batzuetan arazoak dituzte jubilatuen egoitzetako tabernetan lan egingo duen jendea lortzeko eta guk zazpi urte daramatzagu inongo arazorik gabe. Egungoaren aurretik zegoenarekin arazoak izan genituen eta Barrenetxeri eskaini genion, El Salvadorren ondo lan egiten ari zelako. Adinekoekin esperientzia baloratzeari dagokionez, adinekoekin tratu berezia izan behar delako txertatu nahi izan genuen. Eta euskarari dagokionez, zergatik jubilatuetan bai eta lorezaintzan ez?”.
