Andoni Vazquez (Eibar, 1993) Zumarragako musika bandako zuzendari berria da. Ane Legarretari hartu dio lekukoa. Lehen kontzertua otsailean egin zuen eta bigarrena apirilaren 19an egingo du.
Vazquezek Eibarko bandan eta Kantu Kolore haurrentzako taldean jo zuen, besteak beste. Egun, Eibarko bandako zuzendaria da. 2019tik Legazpin bizi da, emaztearekin. Biak Doinua musika eskolako irakasleak dira.
Nolatan musika zalea?
Nire etxean musika asko maite izan da beti. Amama (Montse Baglietto) euskal dantza taldeko dantzaria zen eta aitaita (Manuel Santos) Eibarko musika bandako perkusionista izan zen, 50 urtean. Musika beti egon da oso presente nire familian. Ez naiz gai gogoratzeko noiz hartu nituen lehenengoz makil batzuk danbor bat jotzeko. Nire egunerokotasunean beti oso presente egon den zerbait da.
Argi zenuen, beraz, perkusioa ikasi nahi zenuela.
Bai, baina 5 urterekin pianoarekin hasi nintzen. 12 urte bete nituen arte edo, piano ikasi nuen. Ondoren, perkusioarekin hasi nintzen.
Ze ibilbide egin duzu ordutik?
Eibarko bandan sartu nintzen eta ondoren Eibarko txarangan jotzen hasi nintzen. Kontserbatorioan perkusio klasikoko erdi mailako gradua egin nuen eta proiektu askotan parte hartu dut. Musikenera joan nintzen Donostiara eta lau urteko karrera egin ondoren eskolak ematen hasi nintzen.
Non eman dituzu eskolak?
Legazpin eta Azpeitian ematen ditut. Horretaz gain, Eibarko banda zuzentzen dut. Legazpin zortzi urte daramatzat eta Azpeitian pandemia garaitik. Ikasleak bideokonferentzia bidez ezagutu nituen.
Legazpin bizi zara.
Emaztea eta biok musikariak gara eta biok Legazpiko musika eskolan lan egiten dugu.
Nolatan Legazpin?
Bera ni baino lehen hasi zen Legazpiko musika eskolan eskolak ematen. Biok Musikenen ikasten genuen eta Eibarren bizi ginen eta emazteak Legazpira ere etorri beharra zuen, gainera. Gipuzkoari buelta ematen genion egunero eta bidaia bat kentzea erabaki genuen. Horrela etorri ginen Legazpira. Gustatu egin zitzaigun eta hemen jarraitzen dugu. Bi ume ditugu.
Zergatik gustatu zaizue Legazpi?
Umeak edukitzeko Eibar baino herri aproposagoa da. Eibarren kultur eskaintza zabalagoa dago, baina Legazpiren tamaina eta oinezkoentzat dituen guneak oso egokiak dira umeak edukitzeko eta lasai bizitzeko.
Nolatan erabaki zenuen Zumarragako bandako zuzendari postura aurkeztea?
Beraiek deitu zidaten. Aurreko zuzendariak uzteko asmoa zuen eta ezagutzen nindutenek niri deitzea proposatu zuten Bandakoekin elkartu nintzen eta bidea elkarrekin egiteko modua aurkitu genuen.
Zer aurkitu duzu Zumarragako bandan?
Herriko banda arrunt bat da. Oso adin ezberdinetako jendea du, beste edozein bandak bezala. Ez da oso banda gaztea eta, horri esker, jendeak ofizioa oso ondo ezagutzen du. Eskertzekoa da. Lanerako prest daude eta oso harrera polita egin didate. Bihotza zabaldu didate, lan egiteko eta proposatu ditudan gauzekin aurrera egiteko.
Zein da zure helburua?
Nire helburu nagusia banda Zumarragako bizitza kulturalaren erdigunean egotea da. Herri mailan presente egotea eta gainontzeko elkarteekin lan egitea.
Zer moduz joan zen lehen kontzertua?
Oso ondo. Jende dezente etorri zen eta kontzertua polita izan zen. Ohiko kontzertua: inauteriei erreferentzia inauteri bezperan geundelako, pasodoblea, zarzuela, musika modernoagoa, pelikuletako musika… Nik banda ezagutzeko eta bandakoek ni ezagutzeko aukera izan zuen. Ibilbidea hasteko modu egokia.
Zeintzuk izango dira hurrengo pausoak?
Hurrengo kontzertuan bandarentzat berriak diren obrak joko ditugu. Oso ilusionatuta nago, oso banda zalea bainaiz. Hurrengo kontzertua apirilaren 19an izango da. Prestatzeko denbora izango dugu.
Bandek funtzio garrantzitsua betetzen dute, ala?
Gizartea islatzen duten estamentuak dira: anitzak, adin ezberdinetako jendea, pentsaera ezberdinetako jendea… Herriarekiko konpromisoa duen jendeari toki bat ematen diote. Bandako jende asko, beste elkarte batzuetan dago. Banda bizirik badago, herria bizirik dago.
Alde handia nabaritu al duzu Eibarko eta Zumarragako banden artean?
Itxuraz denak berdinak dira, baina bakoitzak bere herriaren izaera eta bertako jendearen gustuak hartzen ditu.
