Zumarragako Udalak Gure-Txoko jubilatuen etxeko eta El Salvador gizarte etxeko tabernak ustiatzeko kontratazio espedienteak onartu zituen otsaileko osoko bilkuran. EH Bilduk gaiari buruzko prentsa oharra bidali du komunikabideetara. Horra hor prentsa oharraren edukia:
“Ia zazpi urteko atzerapenarekin, Gure Txoko taberna-jatetxearen eta El Salvador-en kudeaketa erregularizatuko duten pleguak osoko bilkurara ekarri ziren otsailaren 24an.
2019tik hona egoera irregularrean egon den esleipen bati amaiera emateko urratsa izan da zorionez. Tabernaren kudeaketa lehiaketa publikorik, kontraturik eta txosten teknikorik gabe esleitu zitzaion Barrenetxe JO 1964 enpresari. Beharrezko den denborarako soilik izan behar zuen, baina ia zazpi urte egon da zerbitzu publiko bat modu irregularrean.
Kontratuen jarraipena egiten ari ginela ohartu ginen esleipenak ez zuela amaiera datarik. Informazioa eskatu genuen, bai batzordeetan bai idatziz, baina ez genuen erantzun formalik jaso. Alkateak prentsan adierazi zuen larrialdiko kontratu baten bidez egin zela esleipena. Hala balitz, non daude larrialdi deklarazioa eta txosten teknikoak? Dokumentazio hori ez agertzea oso kezkagarria da administrazio prebarikazioaren delituaren figurarekin bat etorri daitekeenaren zantzuak egon daitezkeelako.
Egoera publiko egitearen ondorioz, prozesua martxan jarri da eta, azkenean, plegu berriak aurkeztu zaizkigu. Berandu bada ere, iritsi dira. Pleguak jaso bezain pronto 14 hobekuntza proposamen aurkeztu genizkion udal gobernuari, tekniko zein administratiboak. Jarrera eraikitzaileari esker, ekarpen askotan adostasunera iritsi gara eta pleguak nabarmen hobetu dira.
Herriko ostalariei aurkezteko aukera zabaldu diegu. Izan ere, hasierako proposamenean hirugarren adineko ostalaritzan esperientzia duen arduraduna izatea jasotzen zen soilik eta orain aldiz ostalaritza orokorrean esperientzia izatea nahikoa izango da.
Lehen solairuko anbiguaren erabileran ere hobekuntza adostu da eta mugikortasun arazoak dituzten erabiltzaileei zerbitzua bermatu beharko zaie zerbitzuaren irisgarritasunean hobetuz. Gainera, euskarazko arreta bermatzeko, udalak euskarazko prestakuntza bermatuko die zerbitzariei. Beste neurri batzuk ere jaso dira, hala nola abuztuaren 15ean irekiera bermatzea eta lehen sei hilabeteetan jarraipen estuagoa egitea.
Adostasunik lortu ez dugun puntuak ere badaude, hala nola jarraipen batzorde misto baten sorrera (udala, kudeatzailea eta Gure-Txokoko zuzendaritzak osatua) edo aisialdi planaren puntuazio handiegia, horretarako beste enpresa bat baitago esleitua. Zalantzak ditugu, halaber, proiekzio ekonomikoaren inguruan.
Koherentziaz eta erantzukizunez jokatuz, gure baiezko kritikoa eman genien pleguei. Zazpi urte beranduago iritsi dira, baina egindako ekarpenekin hobetu dira eta esleipena legezkotasun, gardentasun eta lehia printzipioetara egokitzeko bidean urrats garrantzitsua izan dira, herriko tabernari guztiei aurkezteko aukera zabalduz, irisgarritasunean hobetuz eta euskarazko arreta bermatzeko neurriak hartuz.
Gure konpromisoa argia da: udal gobernu taldea fiskalizatzen jarraitzea, proposamen eraikitzaileak udalera eramatea eta beti zerbitzu publikoen alde lan egitea”.
