Zumarragako Udalak kerik eta aerosolik gabeko gune bat aukeratzea proposatu die herritarrei eta Zelai Arizti parkea aukeratu dute. Euskadi plazak ere boto asko jaso dituenez, bi tokiak kerik gabeko gune izendatuko ditu. 316 lagunek eman dute bozka eta Zelai Arizti parkeak botoen %44,6 jaso du. Plazak, berriz, botoen %34,7 jaso du.
Toki horietan erretzea ez da debekatuta egongo, baina herritarrek bi toki horietan ez erretzea eskatuko dute eta bertan erretzea gaizki ikusia egongo da.
Egitasmo hau Haurren eta Nerabeen Udal Planaren baitan sortu da. Diagnostiko bat egin zen eta gazteek tabakoaren eta vaper-en inguruko kezka azaldu zuten. Praktika horiek bizitza sozialean, adingabeen zein helduen artean, normalizatuta egoteak dakarren arazoa salatu zuten. Halaber, heldu askok ohitura horiek eguneroko errutinan txertatzeak ematen duen eredu txarraz ohartu zuten. Hori guztia dela eta, udalak, gazteekin elkarlanean, kerik gabeko espazioak martxan jartzea erabaki zuen.
Lehenengo fasean, hiru ikastetxeetako Lehen Hezkuntzako 6. mailako ikasleek Kerik gabeko guneak saioan parte hartu zuten, Gipuzkoako Minbiziaren Aurkako Elkartearen eskutik. Tabakoaren eta beste substantzia batzuen eraginei buruz hausnartu zuten, mitoak desmuntatu zituzten eta ohitura osasungarriak eta ingurunea zaintzea sustatu zuten. Azken helburua nerabeen artean kontsumoa atzeratzea edo saihestea da. Horretaz gain, adin txikikoek kerik gabeko lau espazio proposatu zituzten: Euskadi plaza, Gazte Txokoa, Eitzagako parke berria eta Izazpi auzoko gazteentzako ekipamenduak.
Bigarren fasean, helduei adingabeek egindako eskaera arduratsuari erantzutera dei egiten zitzaien. Helduen inplikazioa lortzeko, gazteek hautatu zituzten lau espazioen inguruko bozketa egin da. Bozkatzeko prozesua amaitu ondoren, hirugarren fasean, emaitzen berri eman da publikoki. Ekitaldi horretan, inplikatutako eragile guztiek parte hartu dute (adingabeak, ikastetxeak, elkarteak eta herritarrak) eta identifikazio seinaleak jarri dira aukeratutako guneetan.
