Gaizka Arakama Urretxuko udal langileak ez ziotela minbizia zuen emaztea zaintzeko baimenik eman salatu du
Gaizka Arakama Urretxuko udal langileak udalak ez ziola minbizia zuen bere emaztea zaintzeko 10 eguneko baimen berezia eman salatu du. Arartekoarena jo du eta honek arrazoia eman dio.
Arakamak, bere emaztea minbiziaz gaixo zegoenean, Udalhitz hitzarmenean jasotzen diren 5 egunetako baimena hartu ondoren Urretxuko Udalean indarrean dagoen gaixotasun larrien baimenaren luzapena aplika ziezaiotela eskatu zuen. “Baimen horretarako beharrezko ziren eta eskatutako txosten guztiak aurkeztu nituen. Are gehiago, emaztearen osasun egoeraren pribatutasuna albo batera utzi eta behar baino diagnostikoaren eta prozesuaren zehaztasun gehiago jarri nituen mahai gainean, udaletik arazoak besterik jartzen ez zizkidatela ikusirik”.
Udalak baimena ukatu zion, inongo dokumentu ofizialik ezta azalpen txikiena ere eman gabe. “Hainbatetan eskatuta ere, oraindik gaur, ia bi urte geroago, ez dut udalaren eskutik ezer jaso”.
Hau ikusirik, bere eskubideen defentsan Arartekora jo zuen. “Urte betez luzatu den prozesu honetan udalak argudio kontraesankorrak, egia-erdiak eta trikimailu ezberdinak erabili ditu prozesua bera atzeratu eta bertan behera gelditu zedin, Arartekoak berak txostenean adierazten duen bezala. Azkenean, Arartekoak arrazoia eman dit”.
Arartekoak eskatutako 10 egunak emateko hartzen uzteko gomendatu dio udalari, baina udalak ez dio erantzun. “Udalak nahikoa azalpen eman zituela eta gaia preskribatua zegoela esan zuen. Arartekoak ez zegoela preskribatuta esan zion”.
Arakama minduta ageri da. “Egoera oso gogorra izan zen. Ez zidaten erantzuten eta ez ziren egoeraz kezkatzen. Egoera horretan, kasurik ez egitea, oso gogorra da. Gauzak erraztea, bidea arinagoa egitea espero nuen. Udaleko langile batek, hitzez, 10 eguneko baimena gaixotasun larriagoetarako dela esan zidan. Minbizia baino larriagoa? Karga nire gainean jartzen ari ziren sentsazioa nuen, aprobetxatzen ari banintz bezala. Horrek haserretu egin ninduen. Horregatik erabaki dut publiko egitea. Bularreko minbiziaren aurkako egunean udaletxean argazkia ateratzen dutela ikusten dudanean, gure etxean min handia ematen digu. Gaixoek eta senideok babesa behar dugula esaten da eta gero… Zirkulua ixteko egin dugu publikoa”.
