Zelai Arizti aretoan Urretxuko aktorearen 'Castigo divino' pelikula eman dute eta azken emanaldian Zufiaurrek parte hartu du
Larunbatean, igandean eta atzo (astelehena) Gorka Zufiaurre aktore urretxuarraren Castigo divino pelikula eman zuten Zelai Arizti aretoan. Atzo arratsaldeko saioan Zufiaurrek parte hartuko du. Aktore urretxuarra bere familiarekin joan zen ekitaldira.
Hasteko, Mikel Serrano alkateak Zufiaurreren izaera goraipatu zuen eta telesail eta pelikula garrantzitsuetan lan egin duela gogoratu zuen (Goenkale, Loreak, Fuego, La que se avecina…). “Umila, eskuzabala eta profesionala da”, esan zuen.
Ondoren, Juan Davila aktoreak (Castigo divino pelikulako aktore nagusia) bidalitako mezu bat eman zuten. “Gorka oso handia da. Pelikulaz gozatzea opa dizuet, nik Gorkaz gozatu dudan bezainbeste”.
Zufiaurre eszenatokira igo zen eta pelikulan egindako lanaz mintzatu zen. Pelikulako protagonista Pedro (Juan Davila) da, erizain kaotiko eta bakartia. Kutxa magiko bat aurkituko du eta horrek bere bizitza goitik behera aldatuko du. Izan ere, kutxak besteei laguntzako aukera ematen dio, baina arau zorrotz batzuk bete behar ditu. Zufiaurre ospitaleko atezaina da. Natalia Rodriguez, Lolita, Macarena Gomez, Dario Paso eta Pepon Nieto aktoreek ere pelikula horretan lan egin dute.
Bere lanbideaz eta etorkizunaz ere hitz egin zuen, alkateak galdetuta. “Pelikulak lagunak egiteko, ikasteko… egiten ditut. Proiekturen bat dut, baina oraindik ezin dut ezer esan”, aipatu zuen.
Horretaz gain, zinema aretoan zegoen Sergio Gonzalez de Galdeanori eskerrak eman zizkion. Zufiaurrek Galdeanoren patata biltegian lan egiten du. “Eskerrak eman nahi dizkiot, erraztasun guztiak ematen dizkidalako pelikuletan eta telesailetan lan egiteko”.
Zufiaurrek Urretxu eta Zumarragako Karmakros antzerki taldean hasi zuen bere ibilbidea eta Karmakroseko taldekideak ere eszenatokira igo ziren. “Gorkari eskerrak eman nahi dizkiogu, oso giro ona jartzen baitzuen. Burumakur geundenean, animoak ematen zizkigun. Zoritxarrez, taldea desagertu egin zen, Gorka bezalako gazteak falta zirelako”, esan zuen Arantxa Azaldegik. Karmakroseko kideek lore sorta bat oparitu zioten. Alkateak, berriz, Antioko argazki bat oparitu zion herritar guztien izenean.
Emanaldia hasi aurretik, Jose Coronado aktore ezagunak bidalitako mezua eman zuten pantaila handian. “Maite zaitut eta miresten zaitut, Gorka. Zurekin lan egitea oparia izan zen. Eskerrik asko opari hori egiteagatik. Ea berriro elkarrekin lan egiteko aukera dugun. Ahal bada, hurrengoan komedia batean izan dadila”.
