Lan mundura itzultzeko zailtasunak dituzten zortzi bizilagunek ikastaroa egin dute Zumarragan. Gaur diplomak jaso dituzte, udal brigadaren biltegian. Ekitaldian Mikel Serrano Zumarragako alkateak, Mikel Torres lehendakariorde eta Ekonomia, Lan eta Enpleguko sailburuak eta Arantxa Niño Lanbideko Enplegu eta Formakuntza zuzendariak parte hartu dute.
Parte hartzaileek bi hilabeteko ikastaroa egin dute eta datozen sei hilabeteetan arlo praktikoa eta teorikoa uztartuko dituzte. Igeltserotza ikasi dute. Proiektu honetan parte hartu duten zortzi bizilagunak Jose Maria Heras, Moises Gorjon, Alfredo Daniel Borja, Iñaki Castillo, Said Kaddari, Ramon Nieto, Jose Eugenio Heras eta Gorka Sanchez dira.
Egitasmo honetan Eusko Jaurlaritzak, Zumarragako Udalak, UGLE eskolak, Uggasa garapen agentziak eta Burdinaren Industriako Langileen Fundazioak parte hartzen dute. Prestakuntza teknikoa, laguntza pertsonalizatua eta ikasitako horretan praktikak egiteko aukera eskaintzen diete parte hartzaileei.
Aurtengoa laugarren edizioa izan da. Edizio bakoitzean zortzi pertsonak hartzen dute parte. Inbertsioari dagokionez, Eusko Jaurlaritzak, Lanbideren bidez, 510.500 euro bideratu ditu lau urte hauetan. Zumarragako Udalak, berriz, 83.936 euroko ekarpena egin du.
Serranok jaurlaritzari eskerrak eman dizkio. «Egitasmo hau ez litzateke posible izango jaurlaritzaren eta Lanbideren laguntzarik gabe. Proiektu honi esker, lan mundura itzultzeko zailtasunak dituztenek, formazioa jasotzen dute. Lau urte daramatzagu egitasmo horretan. Aurten lorezaintza ikasi dute. Iazko ikastaroan parte hartu zuten lau lagun udal brigadan lan egiten ari dira, errefortzu gisa. Gainera, gainontzeko parte hartzaileak lan poltsa batean daude. Enpresetan erreleboa behar dute eta hau erakusleiho bat da, enpresek beraien berri izan dezan».
Langabezia
Egitasmoaren garrantzia azpimarratu du. «Langabezia %10,7koa da eta langabetuen bi herenek formazio eskasa dute. Egitasmo hau oso lagungarria zaie. Oso positiboa da, bai parte hartzaileentzat eta bai langile kualifikatuak behar dituzten sektoreentzat. Erreleboa behar da eta zailtasunak dituzte. Hori guztia dela eta, zorionak parte hartzaileei», aipatu du.
Torresek Zumarragako Udalari eskerrak eman dizkio. «Gure sailarekin lan egiten duen udal bat bada, hori Zumarraga da. Horrelako egitasmoei esker, bizilagunei enplegu on bat lortzen laguntzen zaie. Hori dela eta, askotan Zumarraga adibide bezala jartzen dugu».
Ikastaroan parte hartu dutenen ahalegina ere txalotu du. «Esfortzua egin duzue, konpromisoa erakutsi duzue. Horrek lana aurkitzen lagunduko dizue. Hori da, hain zuzen ere Eusko Jaurlaritzaren eta Lanbideren helburua: enpresetan pertsona kualifikatuak behar dira eta egitasmo honen eskutik kualifikazioa lortu duzue. 45 urtetik gorakoek, desgaitasun bat dutenek… lan bat aurkitzeko zailtasunak dituzte eta pertsona horiei laguntzea gure betebeharra da. Zuek lan mundura itzultzea nahi dugu. Une zehat batean lan merkatutik kanporatu zintuzteten eta egitasmo honek itzultzen lagunduko dizue. Langabezian gelditu aurretik zenuten lana baino hobea izatea nahi dugu».
Kualifikazioa geroz eta garrantzitsuagoa dela gehitu du. «Lan merkatua geroz eta exijenteagoa denez, geroz eta prestakuntza hobea behar da. Hori dela eta, formazioa oso garrantzitsua da. Seguru aski, zuetako askok ez zenuten uste hiriguneen mantentze lanetan arituko zinetenik, baina egitasmo honi esker horretan aritu ahal izango zarete. Eta formazioari esker, kalitatezko lanpostu batean. Izan ere, ez dugu edonolako enplegua nahi, kalitatezko enplegua nahi dugu. Jendeari bere bizitza proiektua etxetik gertu eta duintasunez aurrera ateratzen lagunduko dion enplegua. Hori lortzeko, etxebizitza politika ere oso garrantzitsua da. Eta guzti hori lortzeko, instituzioen arteko lankidetza ezinbestekoa da», amaitu du.
