Minbizia zuen emaztea zaintzeko baimenik ez zuela jaso salatu zuen langilearen aferaz eztabaidatu dute Urretxuko osoko bilkuran
Gaizka Arakama Urretxuko brigadako langileak udalak ez ziola minbizia zuen bere emaztea zaintzeko 10 eguneko baimen berezia eman salatu zuen komunikabideetan. Arartekoarengana jo zuela, honek arrazoia eman ziola eta udalak ez duela erantzun esan zuen. Atzoko osoko bilkuran, erreguen eta galderen puntuan, EH Bilduk gaia zertan den galdetu zion Jon Luqui alkateari. “Urretxuko Udala da Arartekoaren ebazpen bat bete ez duen bakarra. Ze neurri hartu dira Arartekoari erantzuteko? Ze neurri hartuko dira berriro gerta ez dadin?”, galdetu zuen Jon Altolagirre bozeramaleak.
Luquik Arartekoari eta Arakamari ez erantzutearen arrazoiak eman zituen. “Arartekoak iradokizunak egiten ditu, ez du epaitegi baten ahalmena. Bere emazteak minbizia zuela egunkarien bidez jakin dugu. 10 egunengatik iskanbila hau sortzea arraro samarra da. Gai honek brigadaren antolaketarekin eta erretiroa hartuko duten brigadako langileekin ere lotura du. Brigada buru berria nor izango den esan eta berehala, jarrera aldatu egin zen. Brigada buruaren aginduei zenbaterainoko kusua egiten zaien, ez du kamioia gidatzeko egin beharreko ikastaroa egin nahi izan…”.
Alkatetzan daramatzan urteetan ez duela horrelako arazorik izan gehitu du. “Langile asko egon dira bere egoeran eta ez da arazorik egon. Berak egun asko hartu zituen, baina arrazoitu beharra dago eta kasu horretan ez zuen arrazoitu”.
Ez zaio egokia iruditzen komunikabideetara jotzea eta gaia osoko bilkuran ateratzea. “Komunikabideak eta osoko bilkura erabiltzea… uf! Eskubidea du, baina zenbait gauza ezin ditugu kontatu eta, beraz, desabantaila egoeran gaude. Gai pertsonala da eta hau ez da toki onena gai horri buruz eztabaidatzeko. Ez naiz etorri pailazoarena egitera eta ez diot inori adarra jotzen utziko. Ikusiko dugu nola bukatzen den, baina ez du itxura ona”.
EH Bilduko Julen Azpeitiak Arartekoaren gomendioak garrantzia duela erantzun zion. “Prentsaren bidez izan dugu honen berri. Urretxuko Udala da Arartekoari erantzun ez dion bakarra”. Luquik osoko bilkura ez dela gai hori eztabaidatzeko toki onena errepikatu zuen. “Hau guztia zuri esan nizun. Gaia kaleratu nahi duzue, zarata gehiago egin nahi duzue… Ez dugu irudi ona ematen. Lortu duen gauza bakarra brigadako giroa gaiztotzea izan da. Nork erabiliko du brigadako kamioia? CAP agiria eskuratu beharra du. Hau ez da gaztelekua. Ezin izan dugu gure burua defendatu, gaixotasun bat medio, ezin ditugulako gauza batzuk esan. Populismoa egin nahi al duzue? Kontzientzia oso lasai dut. Berak ikusiko du zertan dabilen. Bera da hemen geldituko dena. Gu ez. Gauza bakarra dut argi: ez dela brigadako burua izango. Langile batek ez dit adarra joko. Gai honek 1.000 ertz ditu eta guztien berri eman dizut. Arartekoari ezin diot guztia esan gai pertsonala direlako. Ezin dut, ezta ere, bajan zenbat egun egon den esan”.
“Langile batek hori egiten duenean, bide guztiak agortu dituelako izango da”, erantzun zion Altolagirrek. “Lan egindako egunak erakutsita dena argituko genuke, baina ezin dut hori egin. Jendeak alkatea gaiztoa dela esango du, baina ez da hala. Langileak ez du gure kode etikoa errespetatu. Arauak daude. Bestela, hau ez da udal bat, gaztelekua baizik”.
