Urretxuko jaietan oraingoz bi karroza bakarrik egingo direla ikusita, parte hartzea sustatzeko neurriak hartu dira
Bi kuadrillek bakarrik azaldu dute Urretxuko Euskal Jaiko desfilean karroza egiteko asmoa. Hori dela eta, aste honetan bilera egin da gaiaren inguruan hausnartzeko. Bertan, 50 lagun inguruk parte hartu dute (udal ordezkariak, eragileak eta herritarrak). Guztiek kezka azaldu dute eta hainbat neurri hartzea adostu dute. Karroza egiten duten laguntzei diru-laguntza handiagoa emango zaie (1.000 euro), kuadrilla bakoitzak herri bazkarirako 10 txartel jasoko ditu eta sariak hobetuko dira. Jon Luqui alkateak eta Beñat Zamalloa teknikariak prentsaurrekoa egin dute gaur horren inguruan.
Urretxuko Udalak Euskal Jaiko desfilean karrozekin parte hartzeko izen-ematearen beherakada nabarmenari erantzuteko asteazkenean egindako parte hartze dinamikatik ateratako proposamen guztiak onartu ditu. Iaz desfilean 14 karrozak parte hartu bazuten ere, aurten bi taldek baino ez zuten izena eman hasierako epean. Jaitsiera horrek “harridura eta kezka” eragin zituen herritarren eta udalaren artean. Egoera aztertzeko eta konponbide partekatu bat bilatzeko, uztailaren 8an lanketa irekia egin zen egungo eta aurreko urteetako karrozeroekin, desfilean parte hartzen duten eragileekin eta gaiarekin lotura duten herritarrekin. Guztira, 50 bat lagunek hartu zuten parte saioan.
Parte-hartzaileek egoeraren diagnostikoa partekatu, izen-ematearen beherakadaren arrazoi nagusiak aztertu eta epe laburrean zein etorkizunera begira hartu beharreko neurriak lehenetsi zituzten. Diagnostikoan nabarmendu zen karroza bat prestatzeak lan eta kostu handia eskatzen duela, orain arteko baliabide ekonomikoak eta pizgarriak mugatuak izan direla eta karrozero izatearen berezitasuna ahultzen ari dela. Era berean, belaunaldi erreleborik eza, boluntariotzaren beherakada, herrigintzaren ahultzea eta aurreko urteetako esperientzia belaunaldi berriei transmititzeko zailtasunak aipatu ziren. Parte hartzaileek aurreko edizioen balorazioa lehenago egitearen eta muntaketa prozesuan laguntza handiagoa eskaintzearen beharra ere azpimarratu zuten.
Urretxuko Udalak lanketa irekian jasotako proposamen guztiak onartu ditu. Ondorioz, honako aldaketa hauek egingo dira:
-Karrozak egiteko materialetarako udal laguntza 1.000 eurora igoko da.
-Karrozero eta eragile talde bakoitzeko hamar lagunen bazkariaren kostua hartuko du bere gain udalak.
-Sariak berrituko dira: lehen saria nekazaritza-turismoko establezimendu batean asteburu bateko egonaldia izango da, eta bigarrena herriko zerbitzuetan erabiltzeko bonuak.
Izen-emate epe berri bat zabalduko da, baldintza eta pizgarri berriak behar bezala azaldu ondoren.
Udala aurreko urteetan karrozero izan diren taldeekin harremanetan jarriko da, parte hartzeko aukera berria aurkezteko.
Hasierako epean izena eman zuten bi karrozek aurrera egiteko asmoa berretsi dute. Desfilean parte hartzen duten gainerako eragileek ere orain arteko ekarpenari eutsiko diote, eta udalak talde guztiekin koordinazioan jarraituko du aurtengo desfilea ahalik eta baldintzarik onenetan antolatzeko.
Udalak azpimarratu du hartutako erabakiak ez direla alde bakarrez ezarri. Neurriak asteazkeneko dinamikan parte hartu zuten 50 bat lagunen esperientzia, iritzi eta proposamenetatik sortu dira. “Parte hartze prozesuak aukera eman du egoera modu irekian eta eraikitzailean aztertzeko, ikuspuntu desberdinak entzuteko, erantzukizunak partekatzeko eta konponbide zehatzak adosteko. Udalak bere egin ditu bertan lehenetsitako proposamenak, karrozeroen lana errazteko, haien ekarpena aitortzeko eta herritar gehiago Euskal Jaiko desfilean parte hartzera animatzeko. Izen-ematearen beherakadak agerian utzi du desfilearen inguruko hausnarketa beharrezkoa dela. Egoerari parte hartzearen bidez erantzun diogu: karrozeroak, eragileak eta herritarrak entzun ditugu, eta haiek proposatutako neurri guztiak onartu ditugu. Orain, baldintza hobeak eskaini eta herritarrak berriro ere Euskal Jaiaren parte aktibo izatera animatu nahi ditugu”, adierazi du Urretxuko Udalak.
