Kamiseta eta baloia ere eskaini diote. Hitza hartu duten guztiek gai bat izan dute komunean, gauza bera eskatu dute denek: lesiorik ez izatea, osasuna.
Tradizioa, erlijioa eta kirola batuta, Antioko Ama Birjinari lore eskaintza egin diote gaur eguerdian Urola Kirol Elkarteko emakume eta gizonen futbol taldeek. Urtero denboraldia hasi aurretik egiten du ekitaldi hori klubak.
Lore sorta Ama Birjinaren figuraren oinetan utzi dute aurrena, eta ekitaldiari ekin diote ondoren. Iban Vicente Munilla apaizak denboraldiari aurre egiteko taldearen garrantzia azpimarratu du bere hitzaldian: “Denboraldia ilusioz eta gogoz hasiko duzue, eta emaitzaren gainetik dagoen zerbait badago: ekipoa. Futbolak erakusten digu zerbaitek emaitza bat izateko taldea behar dela. Barkatu akatsak egiten ditugunean. Ekipo batean inor ezin da bakarrik sentitu, eta gauzak espero bezala irteten ez direnean elkarrekin segitu behar da”.
Talde bakoitzeko –neska eta mutilen lehen taldeak– ordezkariek kamiseta eta baloia utzi dute lore sortaren ondoan gero, eta hitza hartu dute. Ekaitz Zabalak eskerrak eman dizkie azken urteetan taldean aritu eta joan den denboraldian kluba utzi dutenei: “Eskerrik asko urte horiengatik, zati garrantzitsua izan zarete sortu dugun guztia sortzen”. Egungo klubeko ordezkariei zein taldekide berriei ongietorria eman die, eta “familia mantentzea” eskatu du.
Leire Alustizak ere eskerrak emateko baliatu du hitzaldia. Aurrena, klubari, “gertutasuna, laguntza eta gogoa” transmititzeagatik. “Oso garrantzitsua delako ez bakarrik taldeko giroa, baizik eta goitik dauden profil horiek gure bidean laguntzea”. Taldeko giroari dagokionez, entrenatzaileari beste urte batez jarraitzea eskertu dio, “oso figura garrantzitsua” izanagatik, eta Legazpitik joandako jokalariei “esfortzu estragatik”. Kadete batzuk ere igo dira lehen taldera, eta animoak eman dizkie: “Denboraldi polita izan daiteke, gogotsu gaude”.
Aitor Irizar nesken entrenatzaileak ere zuzendaritzari eskertu dio nesken futbol egituran pausoak eman izana: “Aurten oso albiste ona izan dugu, nesken koordinatzailea dugu. Urteak daramatzagu egitura hobetzeko eskatzen, eta bide horretan pauso bat da”.
Valen Tena mutilen entrenatzaileak, berriz, klubari emandako konfiantza eskertzeaz gain, futbolaren eta Urolaren balioak nabarmendu ditu hitzaldian. Umetan bizi izandakoa kontatu du balio horiek transmititzeko: “Taldearen parte izatea, baina baita lan egitea, esfortzua, leku bat egiteko talde horretan. Denok nahi genuen kamiseta hori jantzi, leku bat izan, eta horretarako esfortzua zen giltza”.
Felipe Elgarresta presidenteak babesle eta laguntzaileei, jokalari eta entrenatzaileei eskerrak emateko baliatu du ekitaldia, eta laguntzeko prest egongo direla adierazi du: “Denon konpromisorik gabe ezingo zen kluba aurrera eraman”.
Ekitaldia bukatzeko, Mikel Serrano alkateak hitz egin du, eta balioetan jarri du arreta hark ere: “Kirolaren balioak nola uztartzen diren horrelako familia batean. Balio horiek momentu askori aurre egiteko aukera ematen dizute etorkizunean, beste egoera batzuetan”.
Hitza hartu duten guztiek gai bat izan dute komunean, gauza bera eskatu dute denek: lesiorik ez izatea, eta osasuna azken batean.
