Larunbatean Gipuzkoako txapelketa jokatuko du Zarautzen
Iñaki Irigoras urretxuarrak Legutioko eta Azpeitiko arraza libreko artzain txakur lehiaketak irabazi ditu Thor txakurrarekin. Asteburu honetan Gipuzkoako txapelketa jokatuko du, Zarautzen.
Irigoras betidanik izan da txakur zalea. «Beti izan naiz txakur zalea eta artzain txakur txapelketetara umetatik joan naiz. Halako batean txakurrekin hasi nintzen. Txakur bat ekarri nuen, gero beste bat… Jendeak eskua nuela esaten zidan eta beste batzuen txakurrak prestatzen hasi nintzen, etxerako. Baina motz gelditu zitzaidan. Jendeak txakur onak nituela, lehiaketetan parte hartzeko… esaten zidan, baina ez nintzen ausartzen. Izan ere, jende aurrean aritzea eta etxean aritzea ez da gauza bera. Gainera, txakur guztiek ez dute balio lehiaketetan parte hartzeko».
Aurten probatzea erabaki du. «Txakurrak lan ona egin zuen, baina ez nintzen gustura gelditu. Hori dela eta, hurrengo lehiaketara Thor eramatea erabaki nuen. Dena den, ez nuen ziurtasunik. Izan ere, oso kariñosoa da eta jendearengana joango zen beldur nintzen. Baina hiru proba egin ditu eta bi txapel eskuratu ditu eta Mañarian laugarren postuan gelditu zen».
Bihar, 17:30ean Zarauzko Amalur parkean, Arraza Libreko Artzain Txakurren XXVI. Gipuzkoako Txapelketan parte hartuko du. «Lehenengo lauak Euskal Herriko txapelketara sailkatuko dira».
Irigorasek lau txakur ditu. «Egunero beraiekin lan egiten dut, batzuekin gehiago eta besteekin gutxiago. Gogor lan egin behar da txapelketetan lan ona egiteko. Lehiaketetan, segundo bakar batengatik lehen postutik bosgarrenera jaitsi zaitezke. Hori dela eta, txakurrak oso robotizatuta nahi ditut».
Txakur azkarra
Thor oso txakur berezia dela dio. «Fisikoki ez da aparta, ez du kirolari gorputzik, baina buruz oso azkarra da. Oso segurua da eta robotizatuta dut. Aginduak berehala betetzen ditu eta lasaia da». Lau urte ditu. «Heltzen hasita dago. Bi urterekin gazteegiak dira oraindik. Arditan ondo egiten dute, baina burua ez dute bere tokian oraindik. Gehiago kostatzen zaie frenatzea».
Thor Asturiasen (Espainia) jaio zen, baina Kantabriatik (Espainia) ekarri zuen, zortzi hilabete zituenean. «Ikasi gabe etorri zen, baina lan gutxien eman didan txakurra da. Egun, lau border collie eta euskal arrazako bat ditut. Arraza libreko txakurren elkarteko kidea naizenez, ezin dut euskal artzain txakurren txapelketetan parte hartu», azaldu du.
Border colliei irakastea euskal arrazakoei irakastea baino errazagoa da. «Nire euskal artzain txakurrak etxean ondo lan egiten du, baina border collieak askoz ere abilagoak dira. Dena den, horiekin ere borroka latzak izaten ditut. Denak ez dira berdinak. Txakur garestiak dira. 1.000 eurotik behera, ez duzu txakurrik», azaldu du.
Bai txakurrek eta bai artzainek zenbait dohain behar dituzte. «Txakurrek kasu egin behar dute. Lanerako gogoa behar dute. Instintua oso garrantzitsua da. Border collie arrazakoek berezkoa dute: urte asko daramatzate lanean, oso landuta daude. Hori dela eta, ia denek dute afizioa. Oraindik ez dut izan etxerako balio ez duen border collierik. Nagusiak lasaia behar du. Ni urduria naiz, baina Thorrekin oso lasai ibiltzen naiz. Txapelketan lasai ibili behar da, segundo batek ordura arte egindako lan ona pikutara bota baitezake».
Gipuzkoako txapelketan lan ona egitea espero du. «Orain arteko lehiaketetan ez nuen irabaztea espero. Nahiko erraz irabazi ditudanez, Gipuzkoako txapelketan nire helburua Euskal Herrikora sailkatzea da. Horrek hemendik kanpo antolatzen diren lehiaketetako ateak irekitzen dizkizu: Bartzelona, Iparraldea, Amaiur…».
Gazteak lehiaketetan parte hartzera animatu nahi ditu. «Gazteak laguntza eske etorri izan zaizkit, baina denbora asko eskaini behar zaio. Nik ere berehala ikasiko nuela uste nuen, baina ikastaro askotara joan nintzen: Lakuntzan irlandar baten eskutik, Murgian…».
Idiak
Irigoras idi zalea ere bada. Idi pare bat du eta Urretxuko Santa Anastasia jaietako idi proban parte hartuko du. Horretaz gain, Euskal Jaiko ibilaldian aterako da. «Idi gazteak ditut. Urretxun lehiatuko dira lehenengoz. Zazpi urte zain egon ondoren, ea zer egiten duten…».
