Zinekluba: 'Nebraska'

Butak21 Zineklubaren 26. zikloaren barruan, Nebraska filma eskainiko dute, urriaren 10ean. Saio guztiak, 22:15ean izango dira, Zelai Ariztin.

Izenburua: Nebraska.
Jatorria: AEB, 2013
Zuzendaria: Alexander Payne
Aktoreak: Bruce Dern, Will Forte, June Squibb.
Sinopsia: Zahartzaroaren irudikapen sinesgarri bezain tristea da Nebraska. Woody Grant (Bruce Dern), dementziak eta alkoholak jotako agurea da. Dirudun bihurtuko duen ustezko sari baten atzetik, bidaia luze bat egiteko tematuta dago gizona, iruzur baten biktima izan dela konturatu gabe. Bere erabakiak ulertu ez arren, semea errukitu eta laguntzeko prest agertzen da.

Istorio arrunt bat hartu eta bertatik film bikain bat sortzea, hori da Alexander Payne zuzendariak berriro lortzen duena, sortzaile talentuduna dela erakutsiz. Egunerokoa ikusi eta bizi dezakegun kontakizun bat aurkezten du filmak, ikusleagan sentipen ezberdinak sorrarazten dituena, goibeletik barrera. Komedia, drama edo dena delakoa, filma ederra eta sinesgarria da. Zahartzaroaren irudikapen sinesgarri bezain tristea erakusten du pelikulak, buruko gaixotasunak ondorio latzak dituen garai bat. Bruce Dernen antzezpen bikainaren eskutik, halako gaixotasun batek hainbeste jenderen bizitza nola baldintzatzen ikusi dezakegu. Kasu honetan Woody agurea bidai luze bat egiteko tematuta dago, dirudun bihurtuko duen sari baten irabazle izan dela dioen gutun bat jaso duelako. Ez da jabetu iruzur baten biktima dela ordea. Saria jasotzeko ehunka kilometro egin behar dituen arren, joateko erabakia argi du, baita oinez eta bakarrik egin behar baditu ere. Ingurukoen etsipena areagotzeko, dirua, erabili ezingo lituzkeen gauzetan xahutzeko asmoa du. Hau horrela izanda ere, bere semea hartaz errukitu eta laguntzeko prest agertzen da. Bidai bat, paisaiak, zuri-beltzeko argazkia, hizketaldi urri eta batzuetan komikoez baliatuta zuzendariak emaitza bikaina lortzen du. Naturala, ironikoa, melankolikoa, hausnarkorra, benetakoa, komikoa, xamurra eta ederra hori guztia da Nebraska.