Herriko Bertsolari Txapelketa
Aurtengo txapelketan hamar taldetan banatutako 29 bertsolarik parte hartuko dute. Lehen kanporaketa martxoaren 6an izango da, 23:00etan, Motz tabernan. Saio horretan hiru taldek parte hartuko dute: Aitor Lizarazu "Ginz", Amaia Plazaola eta Oihane Vicentek osatutakoak, Uxue Fernandezek eta Itziar Pildainek osatutakoak eta Asier Murua, Iker Soraluze eta Gorka Ojangurenek osatutakoak.
Bigarren kanporaketa martxoaren 12an, 23:00etan, izango da Intrepid Foxen. Saio horretan, Manex Mantxola, Aitor Zabaleta eta Gorka Azkaratek, Juanjo Aranburu "Ajo", Iker Otegi "Otegi II" eta Joseba Segurolak, Aitor Otegi "Otegi I", Igor Susaeta eta Mikel Zabalok eta Ander Gabirondo "Kaxero", Eugenio Lizarralde "Txino" eta Asier Zalduak parte hartuko dute.
Hirugarren eta azken kanporaketa martxoaren 13an izango da, 23:00etan, Aldiri tabernan. Bertan, Gorka Quevedo, Paulo Zabalo eta Josu Aztiria, Jon Torner, Gorka Ganuza eta Gorka Erostarbe eta Iñaki Larrañaga, Eugenio Gisasola "Lutxurdio" eta Antton Fernandez izango dira. Kanporaketa bakoitzean lanik onena egiten duen taldea, Gaztelekun martxoaren 26an 23:00etan jokatuko den finalera pasako da.
Bertso Eskolako klase irekia
Aurtengo klase irekia martxoaren 13an izango da, 11:30ean, Urretxuko Kultur Etxean. Bertan, larunbatero elkartzen diren herriko bertsolariekin batera, Asier Iriondo eta Nerea Elustondo legazpiarrak izango dira. Kultur Etxean bildutakoek Bertso Eskolako klaseetan zer ariketa egiten diren eta zer giro bizi den ezagutzeko aukera izango dute. Klase irekiaren helburua herritarrei Bertso Eskolan egiten den lana ezagutaraztea eta bertsozaleak Bertso Eskolara joatea animatzea da. Herriko bertsolariak larunbatero elkartzen dira Kultur Etxean lagunarteko giroan. Hala, klaseak emateaz gain, bertso jaialdietara joaten dira, ekitaldiak antolatzen dituzte… eta parrandarako tartea ere hartzen dute.
Bertso afaria
Martxoaren 18an, San Jose bezperan, bertso afaria izango da Goierri elkartean. 20:30ean hasiko den afarian Iker Zubeldia, Estitxu Eizagirre eta Gipuzkoako Txapelketan txapeldunorde izan den Jon Martin izango dira. Bertso Eskolakoek bertsolari gazteez osatutako saioa antolatu dute eta ziur hiru bertsolari hauek afalostea primeran girotuko dutela. Gainera, herriko bertsolariek euren maila neurtzeko aukera izango dute.
Kale bertso-antzerkia
Martxoaren 20an Bertso Eskolako kideek kale bertso-antzerkia antzeztuko dute Urretxu eta Zumarragako kaleetan. Ekitaldia 19:30ean hasiko da Zumarragako Euskadi enparantzan. Ondoren, Soraluze kaletik barrena, Urretxu aldera abiatuko dira. Bertso-antzerkiaren nondik-norakoak ezkutuan gorde nahi badituzte ere, ziur aurtengoan ere bertso eskolakoen saioak zeresana emango duela.
Inaxitoren ametsak
Martxoaren 28an, igandea, Trikuharri taldeak "Inaxitoren ametsak" antzeztuko du Labeaga areto berrian. 6 eta 12 urte bitarteko gaztetxoei zuzendua dagoen ekitaldi hau eguerdiko 12:00etan hasiko da. Sarrera doanekoa izango da eta txartelak aurrez leihatilan eskuragarri izango dira. Ikuskizun honen helburuetako bat haurrak hizkuntzarekin gozaraztea da. Horrela ipuinak eta txisteekin batera bertsoa ere tartekatuko da zenbait elkarrizketetan, guztien gozamenerako. Horrez gain, gaztetxoek munduaren geografiari errepaso alaia emateko aukera izango dute.
Bertso paper lehiaketako sari banaketa
"Martxoan bertsoan" programako azken ekitaldia apirilaren 2an izango da. Egun horretan, 15:00etan, Zumarraga-Urretxuko Eskolarteko XVII. Bertso Paper Lehiaketako sari banaketa ekitaldia izango da Labeaga aretoan. Gainera, Bertso Eskolako gaztetxoenek "Bigantxaren ordaina" izenburuko bertso-ipuina antzeztuko dute euren ikaskide eta lagunen gozamenerako. Narratzaile lanetan, berriz, Andoni Salamero izango da.
