Marijo Etxeberria Ezkio-Itsasoko Santa Lutzi auzokoa da eta bertako eskolan ikasi zuen itxi zen arte. 10 urterekin Zumarragako Zelai Arizti ikastetxera joan zen eta gero institutura. Ondoren irakasle-ikasketak egin zituen Eskoriatzan. Arrasateko Udal Euskaltegian hasi zen lanean eta handik hiru urtera Urretxu-Zumarragakora etorri zen. Azaroan HABEk bera eta Mikel Lizarraga omendu ditu, euskaltegietan 25 urte daramatzaten gainontzeko guztiekin batera. Ezkonduta dago eta bi seme-alaba ditu: Beñat eta Miren.
Zer izan nahi zenuen umetan?
Beti gustatu zait jendearekin harremana eta beharbada horregatik hautatu nuen lanbide hau.
Aisialdian zer egitea atsegin duzu?
Zinera joatea, paseatzea eta irakurtzea.
Bizitzeko toki bat?
Zumarragan gustura nago, baina nire jaioterria asko gustatzen zait. Ezkiokoa sentitzen naiz eta ama bertan bizi da.
Zer diozu euskaltegiko lanaz?
Gustukoa dut, baina ikasleak asko aldatu dira. Lehen jendeak euskaraz ikasi nahi zuen eta orain perfilen eta azterketan inguruan lan egiten dugu.
Lankide bat?
Mikel Lizarragak asko lagundu eta irakatsi digu. Oso berezia da guztiontzat. Maite Zalduarekin ere harreman berezia izan dut beti.
Omenaldiko argazkietan Mikel eta zu lehendakariaren ondoan agertu zineten…
Atzean jarri ginen eta gero aurrera pasatu gintuzten. Zumarragako kultur etxean erakusketa ireki duen Iñigo Arregiren eskultura bana eman ziguten.
Nork hitz egiten du euskaraz bereziki ondo?
ETBko esatarien artean Xabier Usabiaga gustatzen zait.
Eta nork hitz egiten du trakets?
Oraindik hainbat tokitan euskaraz hitz egiten ez duen jendearekin topo egiteak harritu egiten nau: ospitaletan, udaletxetan…
Ilehoriak ala beltzaranak?
Denak.
Egindako azken oparia?
Praka batzuk, alabari.
Eta jasotakoa?
Amak, eraztun bat.
Data bat?
Nire aita istripu batean hil zen eta data hori gerturatzen denean beti gogoratzen naiz.
Neska eta mutil izen bana?
Izen motzak atsegin ditut.
Zein egunkari irakurtzen duzu?
Berria, Hitza, Noticias de Gipuzkoa, DV… Tokatzen direnak.
Gustuko telebista saioa?
ETBn Horrelakoa da bizitza ikusten dut. Besteetan telesailak.
Bereziki gorroto duzuna?
Kirol saioak ez zaizkit asko gustatzen.
Pelikula bat?
Azkena Vicky Cristina Barcelona ikusi dut. Gustatu zait.
Liburu bat?
Azkena Ruiz Zafonen Marina irakurri dut. Gustatu zait.
Soinu bat?
Musika zalea naiz, baina naturarekin lotutakoak nahiago ditut.
Usain bat?
Kafe egin berriarena.
Janari bat?
Pasta eta arroz zalea naiz.
Ura ala…
Ura. Janariarekin edariarekin baino gehiago gozatzen dut.
