Hauxe da Urretxuko Eusko Alkartasunak otamotz.eus-era igorritako eskutitza. Hemen duzue osorik irakurtzeko moduan:
2007ko irailean ANVk, PSE-EEk eta EBk, -PNV abstenitu zen-, indarrean ziren arau subsidiarioak geldiarazi zituzten. Osoko bilkura horretan erabaki hori “akats historikotzat” jo genuen. 16 hilabete ondoren gogoeta hori berresten dugu. Gure ustez Urretxuk aukera ederra galdu zuen orduan etorkizuna bermatzeko. Etxebizitzak eraikitzeko, lurzoru industriala eskaintzeko eta hezkuntza, kultur eta kirol azpiegitura berriak martxan jartzeko tresna egokiak zituen Udalak mahai gainean. ANVk olatu hartzeari eta txanpa ezin hobea egiteri muzin egin zien.
Planteamendu panpoxo-panpoxo honen aurrean, eta bat-bateko balorazio gisa, Eusko Alkartasunak hiru gogoeta egin nahi ditu. Alde batetik, ANVren kontraesanak salatu nahi ditugu. Pasa den legealdian, orduan Herribidek, kritika latzak egin zituen, besteak beste, udalak eta ikastolak harturiko akordioaren kontra eta astakeriatzat jo zuen 440 etxebizitza eraikitzea -erdiak tasatuak edo babes ofizialekoak- bi herrietan milatik gora etxebizitza huts zirelakoan. Orain, aldiz, 1.000 etxebizitzen beharra dago Urretxun. Zer esanik ez supermerkatu bat eraikitzea jarduera ekonomikoa behar zuen-behar duen Irimoko eredu horretan! Orain, aldiz, Aparizio auzo osoak supermerkatu horri lekua utzi behar dio. Hamaika ikusteko jaio ginen!
Bigarren gogoeta erantzukizunarena da. Zoritxarreko 2007ko iraileko osoko bilkura horretan Urretxuren geroa bermatzeko lan egiteko prest zegoela adierazi zuen EAk. Hori egin dugu eta hori egiteko prest gaude orain ere bai. Urretxun ezker abertzaleak egin ez duena egiteko prest gaude, hau da, geure burua ezezko borobilean gorde ordez herriko etorkizuna berriro ere jokoan dagoenez proposamena tentu handiz aztertu nahi dugu, alde onak goraipatuz eta gustuko ez ditugunak –eta badira hainbat- eztabaidatzeko.
Hau guztia azken gogoetarekin lotuko dugu. Izan ere, EAren kezka nagusia da -eta behin baino gehiagotan azaldu duguna- Urretxu erabat geldirik ikustea gaur egun, noraezean eta egoera ekonomiko zail baten pean. Azken urte hauetan proiektuak aurrera ateratzeko zailtasun berezia du Urretxuk. Horregatik, alderdi guztiei hausnarketa serioa, sakona eta aurreiritzirik gabekoa egitea proposatzen diegu, Urretxuk berriro ere garatzeko aukera galdu ez dezan.
- EAJ-PNV-k “Urretxu 2020” proiektuaren gaineko iritzia eman du.
- Urretxuko Udalak hiri-plangintzako arau subsidiarioen aldaketak aurkeztu ditu.
