Alfonso Arratibel Ezkioko Santa Lutzi auzoan jaio zen, baina Gabirian, Urretxun, Donostian eta Zumarragan ere bizi izan da.
14 urterekin harakin izatea erabaki zuen eta Candido Mendizabalekin eta Donostiako harategi batean ikasi zuen ofizioa. Aitaginarreba harakina zuen eta ezkondu zenean haren harategia hartu zuen. Bere odolkiek eta buzkantzek sekulako ospea hartu zuten eta, duela 10 urte erretiratu zen arren, asko dira oraindik garai honetan berataz gogoratzen direnak. Aurten ere buzkantza lehiaketako epaimahaikide izango da.
Zer izan nahi zenuen umetan?
14 urte bete nituenerako banekien harakina izango nintzela. Zortea izan nuen: berehala lana aurkitu nuen eta gustura aritu nintzen.
Aisialdian zer egitea atsegin duzu?
Mendira eta perretxiku bila joatea gustatzen zait.
Bizitzeko toki bat?
Bizi izan naizen toki guztietan gustura egon naiz.
Gustuko mendia?
Belokira, Izazpira eta Irimora joaten naiz gehienbat. Batzuetan, Urbiara ere bai. Perretxiku bila, berriz, Otzaurtera joaten naiz.
Gustuko perretxikua?
Onddoa.
Gustuko haragia?
Txahal emearena.
Ilehoriak ala beltzaranak?
Niretzat morena hartu nuen eta morenak gustatzen zaizkidala esan beharko dut…
Egindako azken oparia?
Ez dut gogoratzen. Opariak emaztearekin batera egiten ditut. Diru kontuez emaztea arduratzen da. Emakumeak administratzaile onak dira.
Eta jasotakoa?
Seme-alabek egindakoak: batek betaurrekoak, besteak erlojua…
Data bat?
Ezkondu gineneko eguna: San Isidro eguna. Bestelakoan, Santa Isabel eta Santa Lutzia egunak ere oso gogoko ditut.
Neska eta mutil izen bana?
Hiru alaba ditudanez, emaztearena esango dut: Maria. Mutil izenei dagokienez, semeenak: Javier eta Anton.
Zein egunkari irakurtzen duzu?
Hitza eta El Diario Vasco.
Gustuko telebista saioa?
ETB ikusten dut gehienbat. Pilota partidak, Kalaka, Mihiluze…
Bereziki gorroto duzuna?
Salsa Rosa eta halakoez gain Goenkale.
Liburu bat?
Dagoeneko ez dut libururik irakurtzen: nekatu egiten bainau eta lo hartzen baitut.
Pelikula bat?
Ez ditut pelikula asko ikusten. ETB2n arratsaldeetan botatzen dituztenak bakarrik.
Abesti bat?
Kantua asko gustatu zait beti. Mikel Laboa oso gustuko dut.
Soinu bat?
Etxean musikariak ditut eta kontzertuetara ere joaten naiz. Soinuak? Pianoarena, organoarena, soinuarena, txistuarena, flautarena…
Usain bat?
Kafearena. Edateko ere asko gustatzen zait.
Janari bat?
Babarrunak, txuleta, arraina…
Ura ala…
Ardoa. Ardoarekin jan dut beti.
