Fernando Fariñas (Zumarraga, 1971) Gipuzkoa, Bizkai eta Arabako alderdi sozialistaren exekutibako kide izendatu berri dute. Zumarragarra Goierri garaiko sozialisten buru da Antton Arbuluk kargua utzi zuenetik, orain hiru urte inguru. Hiru aste barru kargu horretan berresteko aukera izango du. ArcelorMittal enpresan lan egin eta gero, ikasketaz ingeniaria da, liberatu gisa lanean ari da Zumarragako Udalean; lehenengo alkateordea eta herri lanetako zein zerbitzuetako zinegotzia da, besteak beste.
PSE-EEko exekutibako kide izateko proposamena jaso zenuenean zer sentitu zenuen?
Sorpresa izan zen. Egia esateko, zure alderdikideek proposatuta eskaintzen dizuten kargua da, eta horrek poza eman zidan; orain arteko lanari aitortza baita. Pozaz gain, halere, erantzukizuna ere sentitu nuen. Izan ere, ordezkatzen duzun jendeari ezin diozu hutsik egin, are gutxiago, hurbilen duzun jendeari.
Zer egiten du alderdi baten exekutibak?
Alderdiaren lerro nagusiak finkatzen ditu.
Zein da zuk beteko duzun lana?
Zumarragako Udalean dedikazio osoko lana dudanez, ez didate arlo zehatzik eman, nire lan nagusia udalekoa izango baita. Exekutiban beste kideekin elkarlanean arituko naiz.
Duela bi asteburu aurkeztu zenuten zuen alderdiaren exekutiba berria. Zein berritasun nabarmenduko zenituzke?
Alderdia eraberritzea izan da kongresu honetako asmo nagusia; ez soilik pertsonak aldatzeko, ideiak eraldatzeko baizik. Exekutibako kide kopurua gutxitu dugu, eraginkorragoa izan dadin; 22 kide izango gara. Bestalde, eskarmentuaren eta jende berriaren arteko oreka gorde nahi izan dute; honetan ere, jende berria biltzeak ez du derrigor kide gazteak ipintzea esan nahi. Bestalde, karguen arteko bateraezintasunaren inguruko arau berriak ere ezarri dituzte; helburua lana behar bezala banatzea da.
Ideien eraberritze hori zein zentzutan egiteko asmoa duzue?
Gizartearen eta alderdi politikoen arteko dibortzioa dagoelakoan gaude, eta demokraziak egoera horri ezin diola eutsi esango nuke. Gizarteak alderdioi gehiago entzun eta irekiagoak izan gaitezen eskatzen digu; hurbildu gaitezen, alegia. Kongresuan hurbilketa hori gauzatzeko bideak izan ditugu hizpide.
Elkarrizketa osoa bihar, Goierriko Hitzan
