Urretxuko Goierri Txirrindu Eskolak 2013 denboraldirako taldeak aurkeztu ditu asteburuan. Berriro bere bideari ekin zionetik, hirugarren denboraldia izango du aurtengoa eskolak. Hiru mailatan banatuta, 32 haurrek eta gaztek osatzen dute taldea. Guztiak mutilak dira, bat izan ezik.
Asteburuan ia etenik gabe bota duen elurraren ondorioz, Ederrena pilotalekuan egin behar izan zuten, orain arte Iparragirre plazan ateratako familia argazkia. Horrela eman diote hasiera martxoan hasi eta uztaila amaierara arte luzatuko den denboraldiari.
Aitor Salaberria eta Aitor Chico txirrindu eskolako arduradunak pozik daude osatu dituzten taldeekin. «Orain hiru urte lau edo sei gazterekin hasi ginen, eta aurten dagoeneko, 32 dira», dio Salaberriak. Chicok zehaztu duenez, hiru mailatan osatu dituzte taldeak: «Kimuen mailan hamazazpi dira, haurrenean lau eta kadeteenean hamaika». Denboraldi berriari baikortasunez begiratzen diote, baina helburu nagusia ez da ezer irabaztea. «Diziplina irakatsi nahi diegu, hau da zerbait lortzeko aurretik lana egin behar dela jakitea garrantzitsua da», amaitu du.
Zikloturista taldeak asteburuan hasiko du 2013 denboraldia
Goierri zikloturista taldeak asteburu honetan hasiko du 2013 denboraldia. Lau irteera daude aurreikusita, larunbatean bat eta igandean hiru. Anjel Etxezarreta zikloturista taldeko arduradunak esan duenez, «dagoeneko 230 lizentzia egin ditugu, baina oraindik gehiago egingo dira». Errepideko bizikleten taldea da jendetsuena, baina iaztik mendiko bizikletako zaletuen taldea ere osatu dute, «momentuz 50 daude izena emanda». Asteburu honetan hasiko dute denboraldia eta urrira arte luzatuko da, abuztuan geldialdi egingo duten arren.
Argazkia: Gotzon Aranburu
Ikusi jarraian Gotzon Aranburuk egindako bideoa
