Martxoan Bertsoa hastera doa. Hamaikagarrena da aurtengoa, eta Zumarraga-Urretxuko Bertso Eskolako kideek berritasun handirik ez dagoela esan badute ere, Urretxuko Aizpurunea kultur etxean egindako aurkezpena aurrera doan heinean, oraingoan ere berritasunak egon badaudela agerian geratu da. Kanporaketa bat gutxiago hartuko du taldekako bertsolari txapelketak, Gorka Azkarate bertso eskolako kidearen arabera, «hasieratik egoitza izan dugun Urretxuko Aldiri taberna itxi baitute».
Hamabi talde lehiatuko dira Goierri garaiko hainbat oholtzatan, eta hamahirugarrena osatzeko aukera badago; iaz baino gutxiago izango dira bertsolariak. Izena bakarka eman dute gehienek, eta aurreko urteetako taldeak hautsi ez dituztenak gutxienak izan dira. Azkarateren arabera, «gure politika bakarkako izen-emate hori bultzatzea izan da, bertsolariak nahas zitezen. Horrek, finean, gure arteko harremana sendotzea dakarrelako». Hori dela eta, zozketa egin dute taldeak osatzeko. Zozketa Martxoan Bertsoa ekimenaren aurkezpenean egin zuten atzo. Beñat Torres bertsolari urretxuarrari egokitu zitzaion talderik gabe geratzea, eta Azkaratek zehaztu zuen «gure erronka orain Beñati taldea bilatzea da».
BERTSOLARI LEHIAKETAKO TALDEAK:
Martxoak 8, ostirala. Urretxuko Motz tabernan, 23:00etan.
- Aitor Lizarazu Ginz eta Aretxabaletako bi lagun.
- Jokin Murua, Endika Igartzabal Anbu eta Aratz Igartzabal Potto.
- Amaia Iturriotz, Maialen Akizu eta Itziar Pildain.
Martxoak 9, larunbata. Ezkio-Itsasoko Igartubeiti baserrian, 18:30ean.
- Oier Oiarbide, Mikel Asurabarrena eta Gorka Maiz.
- Manex Mantxola, Antton Fernandez eta Gaizka Oiarzabal Pitillo.
- Rikardo Gonzalez Durana, Felipe Zelaieta eta Asier Otamendi.
*Joan-etorriko autobus zerbitzua egongo da 18:00etan Zumarragako Elizkaleko geralekutik aterata. Bertso saioa amaituta mokadua banatuko dute eta kupeletik sagardoa edateko aukera izango da. Itzulia ere autobusez egin ahal izango da.
Martxoak 15, ostirala. Urretxuko Fox tabernan, 23:00etan.
- Asier Sasieta, Xabier Elgarresta eta Gorka Santesteban.
- Iban Maiz Banagas, Eñaut Asurabarrena Gaztie eta Aitzol Iturbe Aiztol.
- Ulises Galdos, Asier Iriondo eta Gorka Azkarate.
Martxoak 16, larunbata. Legazpiko Gaztetxean, 23:00etan.
- Manex Agirrezabal, Julen Agirreburualde eta Uxue Fernandez.
- Mikel Iturriotz, Jon Mendizabal eta Jon Gurrutxaga.
- Gorka Ojanguren, Aitor Zaldua eta Andoni Jaka.
Martxoak 22, ostirala. Finala Urretxuko Gaztelekuan, 23:00etan.
