Etzi, Zumarragako Zelai Arizti kultur etxean Xabi Paya irakasleak eta bertsolariak Etxetik erdaraz eta bizi euskaraz, ibilbide baten bizipenak eta ikasketak hitzaldia eskainiko du 18:30ean. Hizketaldia Urretxuko Gainzuri ikastetxe publikoko guraso elkarteak antolatu du.
Hiru urte dira, Gainzuri eskolan, euskararen normalizazioa eta transmisioa bultzatzeko guraso talde bat elkartzen ari dela. Transmisioaren eta hizkuntza portaeren inguruko kezkak komunean jartzen dituzte 10 eta 15 lagun inguruko talde honetan; eskolako gurasoak zein irakasleak biltzen dira taldera. Etziko hitzaldiaren helburuetako bat da talde horretan lantzen dutena beste gurasoei transmititzea. Hori dela eta, Xabi Paya bizkaitarra aukeratu dute hizlari. Izan ere, Payaren ama hizkuntza gaztelania da, eta Gainzuriko antolatzaileek esan dutenez, «Payak beti azpimarratu du zein duen etxeko hizkuntza eta bere gurasoek nola bultzatu zuten euskara ikas zezan».
Payak hitzaldian helaraziko duen mezua gurasoei zuzendutakoa da, eta gurasoek, bide batez, hainbat kezka nahiz galdera azalduko dizkiote: «Zer egin euskaraz dakiten gurasoen erabileran eragiteko? Zer egin ikasleak gaztelaniaz ari direnean? Zein izan zen zen zure gurasoen jarrera? Kontatuko al zenuke zure esperientzia euskaldun berri gisa? Militantziarik behar al da?».
Hitzaldia irekia da
Gainzuriko guraso taldeko kideek hitzaldia irekia dela azpimarratu dute: «Guk antolatu dugun arren, Zumarragako eta Urretxuko guraso, irakasle eta euskaldun oro gonbidatu nahi dugu solasaldira. Xabi Paya komunikatzaile aparta izateaz gain, gai hauetan aditua da, eta bere bizipenetatik zer ikasia izango dugulakoan gaude». Paya, egun, Baionako Unibertsitateko irakaslea da eta ahozkotasunean aditua da; itzultzailea, bikoiztailea, ikerlaria eta bertsolaria ere bada.
