Zumarragako Udalak kaleratu ditu Euskara eta Hezkuntza sailaren bitartez banatzen dituen diru laguntzak eskatzeko oinarriak. Euskara sustatzeko aurrekontua ez dute jaitsi, 47.000 euro emango dituzte euskara ikasteko, merkataritza irudia euskaratzeko eta eskola orduetatik kanpo euskara sustatzeko.
Iazko kopuru bera da, eta udalaren euskara zerbitzutik nabarmendu dutenez, «udaleko hainbat esparrutan ez bezala, murrizketarik egin gabe, euskara sustatzeko apustu garbia egin nahi dugu». Diruz lagunduko dituzten hiru esparruei dagokienez, euskara ikasteko diru laguntzak barnetegietan edo herritik kanpoko euskaltegietan ari diren ikasleek eska ditzakete, baita Udako Euskal Unibertsitatean edo euskararen normalizazioarekin zerikusia duten bestelako uda ikastaroetan parte hartzeko asmoa dutenek. Merkatariek diru laguntzak eskura ditzakete denda kanpoko errotulua, irudi korporatiboa edo web gunea euskaraz jartzeko. Hirugarren arloan irakaskuntza arautuan baina eskola orduetatik kanpo euskara sustatzeko jarduerak burutzeko diru laguntzak daude.
Baldintzak eta epeak
Diru laguntzak jaso ahal izateko Zumarragan erroldatuta egotea ezinbestekoa da, jarduera ekonomikoa bertan burutzen duten merkatariek eskatu ahal dute soilik eta, ikastetxeen kasuan, Urretxuko eta Zumarragako eskoletan aritu behar dira euskara sustatzeko diru laguntzen onuradunak. Eskaera egiteko epea urriaren 31n itxiko dute. Ikastetxeek lehenago bete beharko dituzte izapideak, eta beranduen maiatzaren 7an utzi udaletxean. Eskabide orri arautuak Zumarragako Udaleko webgunean zumarraga.net lor daitezke. Oinarriak eta bestelako informazioa ere webgunean ipini dute, Berriak atalean hain zuzen ere. Webguneaz gain, interesa dutenak udaletxera bertara joan daitezke, eta han Euskara eta Hezkuntza zerbitzura jo, telefonoa: 943 72 91 53.