Zumarragako Gure Txoko jubilatu egoitzak eta El Salvador gizarte zentroak elkarlanean atondu dute XI. Kultur Asteko egitaraua. Apirilaren 13an abiatuko da, eta astebetez erretiratuek egoitzetan egunerokoan egiten dutena erakutsiko diete zumarragarrei. Jarduerak egoitzetatik aterako dituzte, eta boluntarioen lanari esker egiten dituzten ekintzak ezagutzera emango dituzte. Miguel Angel Cenera Zumarragako jubilatu etxeetako lehendakaria da, «hori da, hain zuzen, Kultur Astearen helburua, herritarrei egiten duguna erakustea». Kultur Astearen bitartez, jubilatuak «bizirik» daudela agertu nahi dute, «txokolate jana soiletik harago joan nahi izan dugu beti».
Jubilatu etxeetako boluntarioek euskal dantzak erakusten dituzte edota antzezlanak moldatu zein sortu. Jotak kantatzen dituen taldea ere badago eta abesbatza ere bai. Kultur Asteak jarduera hauek eta gehiago hartuko ditu, jubilatu etxeen jardunaren isla.
Berritasunak asko ez diren arren, Cenerak egitarauarekin lotutako hainbat xehetasun eman ditu. Abesbatzen emanaldiari dagokionez, Legazpiko Buztintegi koruak parte hartuko duela iragarri bazuten ere, «azkenean ezingo dira gure artean egon». Berritasun gisa aurkeztu du Cenerak hiritarren segurtasunaren gainean egingo duten hitzaldia. «Erandioko ertzain-etxeko poliziak etorriko dira, eta zaharrontzat garrantzitsuak diren jarraibideak emango dizkigute». Cenerak Irri Makilak sortutako azken antzezlana nabarmendu du, «gure egunerokoarekin lotutako pasarteekin osatu dute». Kultur Astea itxiko duen bingo handia ere azpimarratu du; ohiko bingoetan 5 zentimo jokatzen badituzte, bingo horretan 10 zentimo jarriko dituzte jokoan.
Egitarau osoa bihar Goierriko Hitzan
