P { margin-bottom: 0.21cm; }Zumarragako 11 bizilagunek ostalaritzari lotutako bi hilabeteko ikastaroa egin dute, zerbitzari izateko prestatu dira eta horietatik 10ek diploma jaso dute. Lanbidek emandako titulua da, eta hori da ikasleek gehien baloratu duten emaitzetako bat.
Salbuespen bat egon bada ere, beste ikasle guztiak 35 urtetik beherakoak dira. Zumarragako Udaleko gizarte zerbitzuen bitartez izan zuten ikastaroaren berri. Guztiak langabezian daude, errenta bermatzeko diru laguntza jaso dute eta 11 ikasletatik 4k minusbaliotasun bat dute. Horiek ziren gizarte zerbitzuetan jarritako baldintzak.
Nolanahi ere, Arantxa Gonzalez gizarte zerbitzuen ardura duen zinegotziak esan duenez, «baldintzekin malguak izaten jakin dugu egoerak eskatuta». Adinean, esaterako, salbuespen bat egin zuten, eta 35 urtetik gorako pertsona batek ere ikastaroa egin du. Ikasleen artean bakar batek, arazo pertsonalak tarteko, ezin izan du ikastaroa amaitu. Amaitu duten guztiek ikastaroaren hirugarren urratsa betetzen ari dira edo betetzear daude: praktikak. Gipuzkoako hainbat ostalari gunean praktikak egiten ari dira, hala hotelak nola jatetxeak.
Virginia de Andresek ez zuen eskarmenturik ostalaritza arloan. Donostiako Amara Plaza hotelean praktikak egiten ari da, eta etzi eguneko kontratua egingo diote «praktikak egiten ukituko ez nukeen sail batean lan egiteko; hotelean arriskatu dira eta ni oso pozik nago. Izugarri ikasten ari naiz». Itziar Aranberrik ezagutzen zuen ostalaritzaren esparrua, baina orain titulua lortu du. «Titulua erakutsi ahal izatea oso garrantzitsua dela uste dut».
Aranberri Castillo hotelean dago, Olaberrian. Iñigo Rodrigezek berretsi egin ditu ikaskidearen hitzak: «Gure lana era profesionalean egin ahal izateko titulua ezinbestekoa da». Rodrigez datorren astean hasiko da Zumaiako Marina Berrin. Aritz Zaldua Londres hotelean dago, Donostian, eta praktikak egin ahal izatea «aukera itzela» dela dio. Praktikak egiteaz gain, teoria landu eta tailerrak egin dituzte.
Mikel Serrano alkateak eman dizkie gaur, Zumarragako Gure Txoko jubilatu etxean diplomak. Laguntza eman dieten guztiei eskerrak eman dizkie alkateak, Adecco fundazioari, ArcelorMittali eta Goierri garaiko Gurutze Gorriari bereziki. ArcelorMittaleko ordezkariak, Zumarragan lantegia duen heinean, «gure inguruarekin elkarlanean aritu nahi dugu, egungo egoera ekonomikoan zailagoa da, baina ahalegin berezia egin dugu».
