Datorren igandean Iñigo Murua eta Markel Lopez haur urretxuarrei laguntzeko kontzertua emango dute Zumarragako Zelai Arizti aretoan. Arratsaldeko zortzietatik aurrera, bi haurren gaixotasunei aurre egiteko tratamendu garestiak ordaintzen laguntzeko aukera izango da, kontzertua zuzenean ikusteko sarrerak erosita edota zero ilarako sarrerak hartuta. Gorka Hermosa soinu jotzailea urretxuarrarekin batera Urretxuko zein Zumarragako hainbat artista igoko dira taulara.
Bi haurrei laguntzeko aukera bi egongo dira egunotan, biak herri bietako hainbat eragilek bultzatuta: igandean egingo duten kontzertua eta Urretxuko nahiz Zumarragako artistek emandako lanen erakusketa, eta artelanak erosteko aukera. Kontzertuak bilduko dituen artisten zerrenda luzea da. Gorka Hermosak ikuskizunaren aurkezpenean adierazi duenez, «artista guztiek lehenengoa baiezkoa eman digute, eta hori eskertzekoa da».
Sarrerak salgai
Sarrerak salgai daude Zelai Arizti aretoko leihatilan, eta egunean bertan ere erosi ahal izango dira. Oraingoan, ez dute preziorik ipini, bakoitzak nahi duen prezioa ordainduko du, beti ere, ordaintzen duen hori bi haurren tratamendu garestiak finantzatzeko erabiliko dela jakinda. Kontzertura joan gabe ere, ekarpenak egiteko aukera badago, horretarako kontu korronte bat ireki dute.
Hermosarekin batera Zelai Ariztiko taulatik honako artistak igaroko dira:
- ZSK txalapartariak
- Jon Lekuona eta Javier Ramos (soinua)
- Jon Iturbe (ahotsa eta kitarra)
- Goiargi abesbatza
- Elisabet Nuñez (piano)
- Lucia Otaegi (klarinetea)
- Barbara Rivas (aktorea)
- Lizarriturri zein Antxiñako Ama txistulariak eta Irrintzi dantza taldea
- The Northagirres
- Zumarragako Musika Banda Luis Orduñak zuzenduta.
Artisten lanak ikusgai eta erosgai Zumarragako Zelai Arizti kultur etxean
Iñigo Murua eta Markel Lopez haurren tratamenduak ordaintzen laguntzeko egiten ari diren ekintzetara batu dira Zumarragako eta Urretxuko zenbait artista. Karikaturak, margolanak, argazkiak eta eskulturak eman dituzte. Horiek guztiak salgai jarriko dituzte, eta salmentarekin ateratzen den dirua Muruaren eta Lopezen familiek jasoko dute. Artelanak ikusgai daude Zumarragako Zelai Arizti kultur etxeko areto nagusian. Batzuek prezioa dute, besteei erosleek prezioa jarri beharko diete. Gorka Hermosak adierazi duenez, «enkantea egitea pentsatu genuen lauzpabost artisten lanak jasoko genituelakoan, baina erantzuna sekulakoa izan da, eta lanak salgai jartzea praktikoagoa zela pentsatu genuen». Lanak erosteko modua Zelai Ariztiko harreran jakinaraziko diete erosleei.
Artistak:
- Josemari Aleman
- Igor Alustiza
- Iker Antia
- Jose Manuel Bereziartua
- Andoni Beristain
- Vanessa Blazquez
- Ane Cabezas
- David Elguea
- Julen Etxezarreta
- Gonzalo Iza
- Asier Larraza
- Andoni Lubaki
- Josu Maroto
- Concetta Probanza
- Iñaki Mariñelarena
- Josu Perez
- Koldo Cadierno
- Carlos Mediavilla
- Maialen Mediavilla
